Yeqor Xvalko: “Görünür onlar hansı kluba gəldiklərini hələ tam anlaya bilməyiblər”

Dörd turdan sonra aktivində xal olmayan, rəqib qapısından bir top keçirə bilməyən "Kəpəz" turnir cədvəlinin zirzəmisində qərarlaşması gəncəli azarkeşlər üçün heç də xoş deyil. "Sarı-göylər"in düşərgəsində nə baş verir? Bu və bizi maraqlandıran başqa suallara cavab tapmaq üçün komandanın kapitanı Yeqor Xvalko ilə danışmağı lazım bildik. Belaruslu legioner Sport24.az-a müsahibəsində bəzi qaranlıq məqamlara aydınlıq gətirdi.

- Öncə "Səbail" ilə oyun barədə fikirlərini bilmək istərdik...
- Meydan sahiblərinin "birinci skiripka" kimi oynayacağını bilirdik. Biz də səfərə qənaətbəxş nəticə üçün gəlmişdik. Təəssüf ki, istəyimizi reallaşdıra bilmədik. Çox sayda mövqe və texniki səhvlərə yol verdik. Rəqib də bundan maksimum istifadə etdi.

- Ardıcıl 4 qarşılaşmadı ki, meydanı xalsız tərk edirsiz. Komandanın təcrübəli futbolçusu və kapitanı kimi uğursuzluğun nədən qaynaqandığını düşünürsən?
- Ötən mövsümdən kollektivdə qalan futbolçular həm təcrübə baxımından artırıblar, həm də daha məsuliyyətlidilər. Düşərgəmizə yeni qoşulanlar var. Görünür onlar hansı kluba gəldiklərini hələ tam anlaya bilməyiblər. Bir məsələni dəqiq bilirəm ki, komandanın uğursuzluğunda ancaq baş məşqçi günahkar deyil. Nəticə yoxdursa hamıməz məsuliyyət daşıyırıq. Üçüncü mövsümdü ki, burdayam. "Kəpəz" Azərbaycan futbolunda özünə görə tarixi olan klubdu. İstənilən futbolçumuz dərk etməlidi ki, hansı klubun formasını geyinir. Hər kəs "sarı-göylər"in tarixinə hörmət etməli, şərəfini qoruduğu klubun uğur qazanması üçün əlindən gələni etməlidi.

- Düşərgənizə bu yay qoşulan legionerlər hələ o qədər də yaxşı təsir bağışlamırlar. Səviyyələri budu, yoxsa hələ tam uyğunlaşmayıblar?
- İndi deyəcəyim sözlər uğursuzluğa haqq qazandırmaq üçün deyik. Təbii ki, məğlubiyyətlər sıralanırsa deməli, nəyisə düz etmirik. Adaptasiya məsələsinə gəlincə, bunun üçün müəyyən vaxt lazımdı. Yeni qoşulan legionerlərin demək olar, hamısı ilk dəfədi Azərbaycana gəlib. Çempionatı tanımırlar, yerli mentalitetə bələd deyillər. Üstəgəl dil baryeri və digər nüanslar da var ki, onlara çətinlik yaradır. Legionerlərimizin səviyyəsi barədə danışmaq bir qədər tezdi. Bu haqda ancaq qış fasiləsində detallı fikirlər söyləmək mümkündü. Məhz onda bilinəcək ki, onlar "Kəpəz" üçün nə qədər faydalıdı.

- Artıq hamı sizi çempionatın aşkar autsayderi kimi qəbul edir. Bu statusla barışmaq çətin deyil?
- Heç bir komanda autsayder olmaq istəmir. Bu barədə düşünəndə belə adamın özünə xoş olmur. Bütün çətinliklərə, məhrumiyyətlərə baxmayaraq ötən mövsüm xarakter göstərməklə elitada qaldıq. Adil müəllim savadlı, işini yaxşı bilən mütəxəssisdi. Onunla ötən il qarşımıza qoyulan hədəfə çatdıq. Düşünürəm ki, heyətimizə daha bir neçə keyfiyyətçi oyunçu cəlb olunsa uğur qazanacağıq. Odur ki, təslim olmamalı, üzərimizə düşən məsuliyyətini dərk edərək meydanda işimizi görməliyik.

ABDULLA İSMAYILOĞLU