Sport24.az
"Millimiz 10 oyundur Fernandu Santuşun rəhbərliyi altında qələbə qazana bilmir. Sözün düzü uğursuzluq başadüşüləndir. Arada təsadüfi qələbə və ya heç-heçə qazansaq belə, bu ancaq baş aldadıcı ola bilər. İllərdir uğursuzluğun olacağını deyirik. Bu, sadəcə nəticədi, hələ son deyil. Qarşıdakı Dünya Çempionatının seçmə mərhələsi oyunlarında Fransa, Ukrayna və İslandiya ilə bizi çətin oyunlar gözləyir. Bu matçlarda xal qazanmağımız sürpriz ola bilər. O da evdə İslandiyadan. Yığmamız müstəqillikdən bu yana ilk dəfə qrupu xalsız başa vura bilər". Bu sözləri Sport24.az-a futbol mütəxəssisi Yaşar Seyidov deyib.
Təcrübəli mütəxəssis yığmanın hazırkı durumundan söz açıb:
"Hazırda milli komandamızda heç bir inkişaf görünmür. Düzdü, baş məşqçi cənab Santuş inkişaf görür, amma o inkişaf nədirsə, biz görə bilmirik. Bəlkə də Fransa, Ukrayna və İslandiyaya qalib gələcəklərini düşünür. O, bir vaxtlar Fransız sosialist utopiklər kimi düşünür. Onlar Fransa xalqını inandıra bilmişdilər ki, narahat olmayın, Fransada çaylardan süd axacaq. Santuş unudur ki, indi orta əsrlər deyil.
Biz ancaq 4 ildən sonra nəyəsə ümid edə bilərik. O da bir halda ki, AFFA-nın futbolun inkişafı ilə bağlı qəbul etdiyi işlər başlanılsa. Azərbaycan minifutbol federasiyasına 8 il vaxt lazım oldu ki, yığmamız dünya çempionu olsun. Orxan Məmmədov bu yolu 8 ilə qət edə bildi. Mənim AFFA rəhbərliyindəb xahişim budur ki, futbolun inkişafı ilə bağlı qəbul edilən strategiyaya qısa vaxtda start verilsin. Bəlkə biz də Orxan müəllimin etdiklərini edə bildik".
Qeyd edək ki, Fernandu Santuşun rəhbərlik etdiyi Azərbaycan millisi Bakıda Macarıstan seçməsinə 1:2 hesabı ilə məğlub olub. İyunun 7-də isə Latviya ilə heç-heçə edib.
