Yaşar Seyidov: "Kimsə yığmanın uğur qazanacağını düşünürsə, çox sadəlövdür"

"Təəssüf ki, millimiz təsadüfi qələbələrə ümid edə bilər". Bu sözləri Sport24.az-a futbol mütəxəssisi Yaşar Seyidov deyib. 

Təcrübəli mütəxəssis yığmanın hazırkı durumundan söz açıb: 

"Millinin uğur qazanması üçün hansısa iş görməmişik ki, onun qarşılığında nəticə gözləyək. Bu gün uşaq futboluna yatırım etmədən, öz gələcəyini düşünmədən hər hansı uğur gözləmək sadəcə olaraq sadəlövlükdür. Mən azərbaycanlı futbol azarkeşkərini də başa düşürəm. Futbolun içində olan biri kimi deməliyəm ki, nə qədər problemlərin həlli yollarını desək də, çox təəssüf ki, onların heç biri əməldə öz əksini tapmayıb və indi də tapmır. Millinin gələcəyi üçün heç bir baza yaratmamışıq. Bu işi görmədən yaxşı nəticələr vəd etmək sadəcə Don Kixotun yer dəyirmanı ilə vuruşması kimi bir şeydir". 

"Kimsə yığmanın uğur qazanacağını düşünürsə, çox sadəlövdür. Milli komanda üçün heç bir iş görməmişik. Gənclərimiz Avropanın klublarına gedə bilmirlər. Qonşu Gürcüstan, Türkiyə və İran nümunədir. Ən azından onların gördükləri işə baxaq. Amma bunu da etmirik. Sadəcə futbol ictimaiyyətində bu sahəni bilən, can yandıran insanların heç bir təklifləri qəbul olunmur. Kimsə desə ki, mən bacarıqlı məşqçi gətirirəm. Yenə də heç bir nəticə olmayacaq. Azərbaycan futbol ictimaiyyətini aldatmamalıyıq. Bu gün iş görmək lazımdır. Vaxt gedir, uduzan Azərbaycan futboludur".