Idman.biz
İspaniyanın "Atletiko" futbol komandasının hücumçusu Xulian Alvares üçün "Barselona" ilə qarşılaşma xüsusi əhəmiyyət daşıyacaq.
İdman.Biz İspaniyanın "Marca" nəşrinə istinadən xəbər verir ki, argentinalı futbolçu yay transfer dövründə Kataloniya təmsilçisinə keçmək istəyib, lakin Madrid klubunun sərt mövqeyi bu keçidə mane olub.
Transferin baş tutmaması futbolçu üçün çətin dövrün başlanğıcı olub. "Vilyarreal"la qarşılaşmada azarkeşlərin fitə basdığı Alvares psixoloji təzyiqlə üzləşib. Bununla belə, argentinalı hücumçu son oyunlarda vurduğu qollarla azarkeşlərin münasibətini dəyişməyə başlayıb.
Cari mövsümdə iki qol vuran futbolçu "Deportivo" üzərində qələbədən sonra azarkeşlərdən üzr istəyib.
"Marca" yazır ki, "Barselona" ilə bugünkü qarşılaşma Alvares üçün özünü yenidən sübut etmək imkanıdır. Antuan Qrizmannın yoxluğunda baş məşqçi Dieqo Simeonenin komandasında əsas ümidlər məhz argentinalı hücumçuya bağlanır.
Alvaresin Kataloniya təmsilçisinə qarşı əvvəlki oyunları da məhsuldar olub. Ötən mövsüm İspaniya Kubokunda 4:0 hesablı qələbə ilə başa çatan görüşdə bir qol və bir məhsuldar ötürmə ilə yadda qalıb. Çempionlar Liqasında isə "Barselona"nın 2:0 hesabı ilə məğlub edildiyi qarşılaşmada cərimə zərbəsindən fərqlənib.
Argentinalı futbolçu 2024/2025 mövsümündə İspaniya Kubokunun 4:4 hesablı oyununda da "Barselona"nın qapısına yol tapıb. La Liqada isə "Atletiko"nun 2:4 hesabı ilə məğlub olduğu qarşılaşmada qol vurub.
Qeyd edək ki, "Atletiko" - "Barselona" qarşılaşması bu gün saat 23:59-da başlayacaq.
