Sport24.az
Premyer Liqada XIII tur başa çatdı. Sport24.az xəbər verir ki, yığmanın oyununa görə çempionatda yaranacaq fasilə ərəfəsində baş tutan hesabat turu daha çox "heç-heçələr həftəsi" kimi tarixə düşdü. Yalnız son oyun günündə azarkeşlər hansısa komandanın qələbə qazandığına şahidlik etdi
5 dəqiqəlik "Neftçi", xarakter göstərən "Şamaxı"
Görünür Samir Abasov da hələ ki, "Neftçi"nin dərdinə dərman tapa bilmir. Meydan sahibləri matçın ilk 5 dəqiqəsində rəqibi 2 dəfə meydanın mərkəzinə dəvət edəndə çoxları "ağ-qaralar"ın cari mövsümdə ilk böyükhesablı qələbəsini reallaşdıracağını düşünürdü. Ancaq necə deyərlər, sən saydığını say, gör "Şamaxı" və "Neftçi"nin müdafiə xətti nə sayır... Abasovun yetirmələri nəinki böyük hesabla qələbə qazandı, heç üstünlüyünü qoruya bilmədi. "Şirlər" meydan sahiblərinin arxa xəttinin bərbad oyun sərgiləməsindən yararlanıb artıq ilk hissədə buraxılan qolların əvəzini çıxmaqla məğlubiyyətdən qaça bildilər. Emin Mahmudovin "ağsaqqalıq" etdiyi yarımmüdafiəyə də demək olar, heç nə ilə yadda qalmadı. Bu gedişlə "ağ-qaralar" 2024/25 "futbol ili"nin sonunda nə mükafatçılar sırasına düşə biləcək, nə də avrokuboklara vəsiqə qazanacaq. "Neftçi" rəhbərliyinin yegana təsəllisi komandanın hər iki qolunda akademiyanın yetirməsi Murad Məmmədovun müstəsna xidmətidi. Yeniyetmə oyunçu "Şamaxı" ilə görüşdə bir qol və bir məhsuldar ötürmə ilə yadda qaldı.
"Şamaxı"nı isə belə oyuna görə alqışlamaq lazımdı. Ayxan Abbasovun komandası erkən qollardan "sınmadı", xarakter nümayiş etdirərək artıq ilk 45 dəqiqədə rəqibin cavabını verdi və Bakı səfərindən 1 xalla dönməyi bacardı.
Qələbə üzünə həsrət qalan "Sabah", özünə gələn "Kəpəz"
Krunoslav Renduliçin artıq kreslosu laxlayıb desək, yanılmarıq. Buna səbəb "Sabah"ın qalibiyyətisz seriyasıdı. "Bayquşlar" sonuncu dəfə 3-cü turda "Neftçi" üzərində qələbəyə sevinib. Sərəncamında yetərində səviyyəli futbolçular olan xorvat mütəxəssis komandanı "qara zolaq"dan çıxara bilmir. "Kəpəz"lə matçda əksəriyyət meydan sahiblərinin rahat qələbə qazanacağını gözləsə də, "bayquşlar" bunu bacarmadılar. Və ən əsası komanda oyun planında gələcəyə ümid vermir. Yalnız futbolçuların fərdi ustalıq səviyyəsi "Sabah"ı daha aşağı pillərə yuvarlanmasına imkan vermir. Hücum potensialı yüksək olan komandanın müdafiəsi bərbad təsir bağışlayır ki, Renduliç geridə qalan turlarda bu "xəstəliyə" əlac tapa bilməyib.
"Kəpəz"ə gəlincə, Azər Bağırov oyundan-oyuna komandanı relsə sala bilir. "Sarı-göylər"in oyun planında da "artırdı" göz önündədi. Ancaq gəncəlilər hələ də autsayderdi və elitaya tərk etməyə ən real namizəddi.
B kateqoriyalı tovuzludan Kurban Berdiyevə ağır zərbə
"Səbail"in enişdə olmasını nəzərə alan mütəxəssislər Kurban Berdıyevin rəhbərlik etdiyi "Turan Tovuz"un hesabatda turunda aktivinə 3 xal yazmaqda çətinlik çəkməyəcəyini düşünürdü. Lakin şənbə günü "dənizçilər"in texniki zonasında əsas söz sahibi olan Elvin Məmmədov həmyerlilərinə kiçik şok yaşatmağı bacardı. Komanda onun rəhbərliyi altında ilk "üçlük"də qərarlaşan kollektivə qarşı layiqli mübarizə apardı. Daha istəkli görünən meydan sahiblərini qələbədən bir neçə dəqiqə ayırdı. İlk hissədə heç nə ilə yadda qalmayan qonaqlar, fasilədən sonra özlərinə gəldilər ki, bu da yetərli olmadı. "Bayıl Arena"dakı matç bir daha göstərdi ki, futbol 90 dəqiqədi, bir hissə futbol oynamaqla heç nəyə nail olmaq mümkün deyil.
Qələbədən doymayan "Araz-Naxçıvan", sabaha ümid evrən "Sumqayıt"
Həftəiçi III turdan təxirə salınmış matçda "Zirə"ni məğlub edən "Araz-Naxçıvan"ın "qartallar"la görüşdə çox güc itirdiyini nəzərə alsaq, "Sumqayıt"ın Mərdəkandan xal aparmaq şansının olduğunu düşünmək olardı. Lakin ehtimallar özünü doğrultmadı. Düzdü, Elmar Baxşıyevin komandası "kimyaçılar"la görüşdə, xüsusilə də ilk yarıda parlaq oyunla yadda qalmasa da, sonda istəyinə çataraq 3 xalı aktivinə yazdırmağı bacardı. Müdafiənin və qapıçının inamlı oyunu Naxçıvan təmsilçisinə qələbə qazanmaqda kömək etdi.
"Sumqayıt" isə yenilsə də, heç də pis təsir bağışlamadı. Vaqif Cavadovun gəlişindən sonra "kimyaçılar"ın oyununda inkişaf hiss olunur. Komandanın əsas silahı müdafiədən hücuma tez keçməsidi. Çatışmyan cəhət isə son nöqtəni qoya bilməmələridi. Mərdəkandakı matçda qonaqlar yaratdıqları qol imkanlarından istifadə edə bilsəydi, evə əlidolu dönəcəkdilər.
Yorulmaq bilməyən "Qarabağ", fürsəti əldən verən "Zirə"
Cəmi 2 gün öncə Qurban Qurbanovun komandası ağır Norveç səfərindən dönmüşdü. "Zirə" ilə oyuna hazırlaşmaq üçün "süvarilər"in 48 saatdan bir qədər artıq vaxtı var idi. Qısa vaxtda uzun yolçuluğu, iqlim və saat dəyişikliyini nəzərə alıb "qartallar"ın bu görüşdən xal və ya xallar götürəcəyini düşünənlər heç də az deyildi. Düzdü, Rəşad Sadıqovun da komandası həftəiçi "Araz-Naxçıvan"la qarşılaşmışdı. Ancaq etiraf edək ki, Bakıda oynamaqla, uzaq Norveçə səfər etmək, Avropa Liqasında oyun keçirmək müqayisə olunmazdı.
Qurban Qurbanov bu dəfə də rotasiya edərək "Bodo Qlimt"lə matçda ehtiyatda qalan və ya az oynamaq şansı qazanan futbolçuları ilk dəqiqədən meydana buraxmışdı. Lakin bu da ağdamlıların qələbəsinə mane olmadı. İlk dəqiqələrdən üstünlüyü ələ alan, oyun planında "Zirə"dən daha yaxşı təsir bağışlayan, daha təravətli görünən meydan sahibləri qonaqları 4 cavabsız qolla məğlub etdi və liderliyi əldən vermədi.
"Zirə" isə nə qədər də balanslaşdırlmış kollektiv olsa da, hələ də "Qarabağ" səviyyəsinə çatmayıb. Qəsəbə təmsilçisi "Sabah"dan bir qədər də aralanmaq və ilk "üçlük"lə aradakı xal fərqini azaltmaq şansını əldən verdi.
