Sport24.az
"Komanda daxilində ab-hava əladır. Yeni mövsümə hazırlıq yüksək səviyyədə davam edir. çox yaxşı hazırlaşır. Demək olar ki, bütün işlərimiz yekunlaşıb. Səbirsizliklə İkinci Liqada ilk oyunumuzu gözləyirik". Bu sözləri Sport24.az-a açıqlamasında "Xankəndi"nin icraçı direktoru Vasif İsmayılov deyib.
O, 2025/2026 mövsümündə İkinci Liqada çıxış edəcək komandanın hədəflərindən danışıb:
"Komandanın qarşıya qoyduğu məqsəd Birinci Liqaya yüksəlməkdir. Qismət olsa, növbəti mövsüm daha üst liqada mübarizə aparmaq istəyirik. Yoldaşlıq matçları keçirmişik. 2-3 oyundan sonra komanda istədiyimiz oyunu meydanda göstərəcək. İlk turlarda çatışmazlıq ola bilər. Düşünmürəm ki, hansısa böyük çətinliklə üzləşək. Heyətdə kifayət qədər təcrübəli futbolçu var. İnanırıq hər şey istədiyimiz kimi gedəcək. Stadionla bağlı Gənclər və İdman Nazirliyinə müraciət etmişik. Hələ bir xəbər yoxdur. Arenada təmir işləri gedir. Səbirsizliklə Xankəndidə oynamağı gözləyirik. Düşünürük ki, ikinci dövrənin oyunlarını orada keçirək. Həmin stadionda oynamaq üçün sözün əsl mənasında alışıb-yanırıq".
Qeyd edək ki, "Xankəndi" ötən mövsüm Region Liqasında çempion olaraq, II Liqada iştirak etmək hüququ qzanıb.
