Idman.biz
İspaniyanın "Real Madrid" klubunun baş məşqçisi Xabi Alonsonun gələcəyi ilə bağlı qeyri-müəyyənlik artır. Klub prezidenti Florentino Peres və idarə heyəti artıq mümkün alternativləri müzakirə etməyə başlayıb.
İdman.Biz xəbər verir ki, mövcud vəziyyətdə ən real namizəd kimi "Real Madrid"in keçmiş müdafiəçisi Alvaro Arbeloa göstərilir. Bununla belə, klub daxilində "gözlənilməz bir variantın" da istisna edilmədiyi bildirilir.
Komandanın paltardəyişmə otağında fikirlər ikiyə bölünüb: bir hissə oyunçular baş verənlərə görə məsuliyyəti Xabi Alonsonun üzərində görür, digərləri isə günahın özlərində olduğunu düşünürlər. Məlumata görə, son həftələrdə Alonso futbolçulara daha yaxın olmağa çalışsa da, son oyunda baş verənlər onun üçün ciddi zərbə olub.
Mənbələr bildirir ki, "Real Madrid"də bəzi oyunçular mövsümün əvvəlindən etibarən Xabi Alonsonun taktiki yanaşmasını və məşq metodlarını tam qavramaqda çətinlik çəkib. Son dövrlərdə isə baş məşqçinin idarəetmə tərzinin "həddindən artıq yumşaq" olduğu, xüsusilə ulduz futbolçulara münasibətdə sərtlik çatışmadığı vurğulanır.
Komanda meydanda da liderlik çatışmazlığını hiss edir. Luka Modriç, Lukas Vaskez və Dani Karvahal kimi oyunçuların yoxluğu komandanın davranışına və oyundaxili nizamına ciddi təsir göstərir.
"Real Madrid" rəhbərliyi həmçinin açıq şəkildə bildirir ki, məsuliyyət təkcə baş məşqçinin üzərində deyil, futbolçular da mövcud vəziyyətdə "günahsız" sayılmırlar.
