Idman.biz
"Real"ın baş məşqçisi Xabi Alonso bu axşam "Atletiko"ya qarşı keçiriləcək İspaniya Superkubokunun yarımfinal oyununda prinsipial qələbə qazanmağa çalışacaq. Madrid derbisinin qalibi finalda "Barselona" ilə qarşılaşacaq. Katalon klubu digər yarımfinalda "Atletik" üzərində 5:0 hesablı qələbə qazanıb.
İdman.Biz xəbər verir ki, "Real" "Atletiko" ilə son dəfə sentyabrda "Wanda Metropolitano" stadionunda üz-üzə gəlib və həmin oyunda 5:2 hesabı ilə məğlub olub. Həmin qarşılaşmada Robin Le Normand, Aleksander Sörlot, Xulian Alvares iki dəfə və Antuan Qrizmann fərqlənib.
Xabi Alonso Bernabeudakı işinə çətin start verdiyi üçün artıq ciddi təzyiq altındadır. Komanda 2026-cı ilin ilk oyununda "Betis"i 5:1 hesabı ilə məğlub etsə də, ümumi formada eniş və "Barselona"nın ardıcıl qələbələri nəticəsində il "Real" üçün rəqibdən 4 xal geri vəziyyətdə başa çatıb.
Yarımfinal öncəsi Alonso bildirib ki, komanda oyuna psixoloji cəhətdən tam hazır olmalıdır:
"Bu yarımfinaldır və biz zehni baxımdan hazır olmalıyıq, mübarizə aparmalı və detallara diqqət yetirməliyik. "Atletiko" həmişə çətin rəqibdir, amma bu oyuna böyük enerji və istəklə çıxmaq üçün kifayət qədər səbəbimiz var. Bu mövsümün ilk tituludur və məhz buna görə ən vacib kubokdur. Liqa oyunundakından daha yaxşı çıxış etmək istəyirik. O oyunda nələrin çatışmadığını bilirik və eyni səhvləri təkrarlamaq istəmirik. Komandanın bu dəfə fərqli üzünü, fərqli səviyyəsini göstərəcəyinə inanıram. Məğlubiyyətlərdən müsbət dərslər çıxarmaq olar və bəzi şeyləri təkrar etməyəcəyik".
