Idman.biz
Albaniya çempionatına qayıdan Vüsal İsgəndərli bu dəfə "Partizani" klubuna keçib.
İdman.biz xəbər verir ki, təcrübəli yarımmüdafiəçi Futbolinfo.az-a açıqlamasında transferi və gələcək planları barədə danışıb.
O bildirib ki, rəhbərlik tərəfindən daha uzunmüddətli müqavilə təklifi alıb: "Sağ olsunlar, mənim istəyimi nəzərə aldılar və hər iki tərəfin razılığı ilə 1 illik uzadıla bilən müqavilə bağladıq. Albaniya mənim üçün uğurlu liqa olub. Buna görə də bura qayıtmaq məndə xoş hisslər yaşadır".
29 yaşlı futbolçu daha əvvəl "Boluspor"da çıxış edib. O, Türkiyə klubu ilə münasibətlərinin xoş notlarla başa çatdığını vurğulayıb: "Boluspor"la müqaviləm ilyarım idi. Müddət başa çatdı və uzatmamaq qərarına gəldim. Çox yaxşı münasibətlə ayrıldıq. Əslində, qışda "Partizani"dən təklif almışdım, lakin həmin vaxt "Boluspor"da qalmağım daha məqsədəuyğun hesab olundu. Yayda isə başqa ölkələrdən də təkliflərim vardı, Albaniyadan isə üç klub maraq göstərmişdi. Sonda "Partizani" mənim üçün ən uyğun variant oldu".
Yeni klubuna uyğunlaşma prosesindən də bəhs edən İsgəndərli hər şeyin qaydasında olduğunu bildirib: "Getdiyim heç bir klubda adaptasiya problemi yaşamamışam. İnşallah, burada da hər şey yaxşı olacaq. Komanda yoldaşlarımla və məşqçilər heyəti ilə münasibətim çox yaxşıdır. Hətta bəziləri əvvəllər "Eqnatiya"da oynadığım vaxt rəqib olduğum futbolçulardır. Fiziki baxımdan bir az geridə idim, çünki komandaya gec qoşulmuşdum. Amma Allaha şükür, indi hər şey qaydasındadır. Yeni mövsümə hazırlıq yaxşı keçdi. Ən əsası, ağır məşqləri zədəsiz başa vurdum. Bu yükləmələrin faydasını qarşıdakı oyunlarda görəcəyik".
Milli komandaya qayıdış barədə də fikirlərini bölüşən yarımmüdafiəçi bu məsələdə əzmlidir: "Baş məşqçimiz Fernandu Santuş hər zaman forma geyinən futbolçuları izləyir və dəvət göndərir. Mən də əlimdən gələni edib milliyə dəvət almağa çalışacağam. Gələcəyi zaman göstərəcək, amma düşüncəm yenə də ölkə xaricində oynamaqdır. Hazırda əsas hədəfim isə komandamla çempionluq yaşamaqdır".
İdman.biz
