Sport24.az
"Hələ Region Liqasında çıxış edərkən düşünürdük ki, gələcəkdə hansısa bölgəni təmsil edək. Bunun üçün rayonlarımızı nəzərdən keçkirdik. Sonda Quba üzərində dayandıq. 20 ilə yaxındı qubalılar böyük futbola acdı. Şimal bölgəsində futbola maraq çoxdu. Elə bu maraq da Quba üzərində dayanmağımıza sövq etdi. Bundan başqa rayonda stadion da var. Çalışacağıq ki, Qubanı layiqincə təmsil edək". Bu sözləri Sport24.az-a "Hypers Quba"nın baş məşqçisi Vüqar Nadirov deyib.
Gənc mütəxəssis saytımıza açıqlamasında toplanış və sponsor məsələləri haqqında da danışıb: "İki gündü Bakıda seleksiyaya başlamışıq. Yaxın günlərdə Qubadaya da səfər edib istedadlı yeniyetmələri üzə çıxarmağa başlayacağıq. Qubanı təmsil ediriksə, heyətimizdə bir-iki yerli oyunçu da olmalıdı. Sponsor axtarışına gəlincə, bir neçə gün öncə Futbol İnkişaf Fondunun rəsmləriylə görüşdük və gələcəkdə sponsorlarla təmin olunması mövzusunda müzakirələr apardıq. Əslində bizim sponsorlar arxasınca qaçmaq niyyətimiz yoxdu. Sərgilədiyimiz oyun və inkişafla iş adamlarının diqqətini cəlb etmək niyyətindəyik. Nə qədər irəliləyir, yuxarı qalxırsansa bir o qədər çox sənə maraq artır. Odur ki, biz meydanda oyunumuzu sərgiləyib yaxşı nəticə qazanmaqla adımızdan söz etdirmək istəyirik".
Qeyd edək ki, "Hypers Quba" yeni mövsümdə II Liqada mübarizə aparacaq.
ABDULLA İSMAYILOĞLU
