Sport24.az
"Zirə"nin keyfiyyətli futbolçuları var. Turnir cədvəlində ikinci yerdə olmaları təsadüfi deyil. İlk hissədə 2:0 hesabı ilə geriyə düşməyimizə baxmayaraq, ikinci yarıda toparlandıq, hesab arasındakı fərqi azaltdıq. Əfsuslar olsun ki, sonda məğlub olduq". Bu sözləri Sport24.az-a açıqlamasında "Sumqayıt"ın kapitanı Vüqar Mustafayev deyib.
Təcrübəli futbolçu Misli Premyer Liqasının 31-ci turunda "Zirə"yə məğlub olduqları oyun haqda fikirlərini bölüşüb:
"Komandamızın məqsədi Premyer Liqada qalmaqdır. Uzun müddət meydana çıxmamağımın səbəbinə gəlincə, bu baş məşqçinin qərarıdır. Bəzən də zədələr imkan vermədi. Qeyri-adi hisslər keçirmədim. İstəyirdim komandam qələbə qazansın, pay sahibi olum. Növbəti matçlarda yenə şans verilərsə, əlimdən gələni edəcəm. Dizimdə bərk ağrılar var. Bu, bir neçə ildir davam edir. Mövsümün sonunda karyerama son qoya bilərəm. Çünki ağrılar meydanda rahat oynamağıma imkan vermir. Hələ dəqiq olmasa da, böyük ehtimalla mövsümün sonunda karyeramı bitirəcəm".
Qeyd edək ki, "Zirə" "Sumqayıt" matçı meydan sahiblərinin 3:1 hesablı qələbəsi ilə başa çatıb.
