Idman.biz
İspaniyanın "Real Madrid" komandasının hücumçusu Vinisius Junior gələcəyi ilə bağlı yayılan şayiələr fonunda komandaya sevgisini açıq şəkildə ifadə edib.
İdman.Biz xəbər verir ki, Vinisius sosial şəbəkədə "Real Madrid" forması ilə çəkilmiş fotosunu paylaşaraq, "Qoy inanılmaz bir il olsun. Həmişə "Hala Madrid". Hamınızı sevirəm" sözlərini yazıb.
Paylaşım 2025-ci ilin sonlarında yaşanan gərginlikdən sonra gəlib. Həmin dövrdə "Sevilya" ilə son oyunda Vinisius tribunalardakı bəzi azarkeşlər tərəfindən fitə basılmış, bundan sonra isə o, sosial şəbəkə profil şəklini "Real Madrid" forması ilə olan fotodan Braziliya millisi forması ilə olan şəkilə dəyişmişdi. Bu addımlar futbolçunun kluba bağlılığı ilə bağlı müzakirələri daha da gücləndirmişdi.
Vinisiusun "Real Madrid"lə mövcud müqaviləsi 2027-ci ilə qədərdir və hələlik yeni sözləşmə imzalanmayıb. Klubun mövqeyi isə aydındır: əgər futbolçu 2026-cı ildə müqaviləni uzatmasa, rəhbərlik onu növbəti yay transfer bazarına çıxarmağı nəzərdən keçirə bilər ki, daha sonra dəyərindən aşağı qiymətə və ya pulsuz ayrılmasının qarşısı alınsın.
