Sport24.az
"Real"ın futbolçusu Viniusius Junioru təhqir etdiklərinə görə, "Valyadolid"in beş azarkeşi məhkəmə qarşısına çıxarılıb. Hadisə 2022-ci il dekabrın 30-da, La Liqanın 2022/23 mövsümünün 15-ci turunda keçirilən "Valyadolid" – "Real" oyununun sonunda baş verib. Viniusius əvəzlənərək ehtiyat oyunçular skamyasına doğru hərəkət edərkən, azarkeşlər ona qarşı "lənətə gəlmiş meymun", "zənci", "lənətə gəlmiş homoseksual" kimi ifadələr işlədiblər.
Sport24.az "Marca"ya istinadən xəbər verir ki, ittiham olunanlar bir il həbs cəzası, dörd il ərzində futbol oyunlarına qatılmaq qadağası və 1080-dən 1620 avroya qədər cərimə olunublar.
Valyadolid vilayət məhkəməsi qərarını rəsmən açıqlayıb. Həbs cəzası şərti cəza ilə əvəz olunub, çünki ittiham olunanlar növbəti üç il ərzində oxşar qayda pozuntularına yol verməməyə və La Liqa oyunlarına getməməyə söz veriblər.
Bu hadisə İspaniya futbol tarixində stadionda nümayiş olunan irqçi davranışın nifrət zəminində törədilmiş cinayət kimi qiymətləndirildiyi ilk məhkəmə qərarı olub.
