Vinçenzo Montella: "Hələ heç nə bitməyib"

Türkiyə millisinin baş məşqçisi Vinçenzo Montella Millətlər Liqasının pley-off mərhələsində Macarıstana qalib gəldikləri ilk oyun (3:1) haqda danışıb. Sport24.az xəbər verir ki, mütəxəssis bu qələbənin komandada arxayınlıq yaratmamalı olduğunu deyib:

"İstədiyimiz hesabla qalib gəldik. Amma hələ heç nə bitməyib. Bu gün iki gənc futbolçumuz millidə rəsmi debüt etdi. Deniz Gül və Oğuz Aydın üstün bacarıqlarını göstərdilər. Həqiqətən də onları oynada bilmək çox vacibdir. Qarşıda bir neçə günümüz var. Arda Güler isə xüsusi bir futbolçudur. Qarşıdakı günlərdə onunla bağlı qərar verəcəyik".

"Meydanda əsl döyüş yaşandı. Çox yüksək səviyyədə fiziki mübarizə apardıq. Macarıstan millisinin necə yaxşı komanda olduğunu hamımız gördük. Ona görə də cavab matçına köklənməliyik. Qapıya daha az zərbə endirdik, amma daha çox qol vurduq. Bu, məni çox sevindirir. Futbolçularımı təbrik edirəm. Azarkeşlərimizin qarşısında oynayanda çox xoşbəxt oluram. Həmişə bizə dəstək olurlar. İndi düşündüyüm yeganə şey bazar günü keçirəcəyimiz cavab oyunudur. Çox kiçik üstünlük əldə etmişik. Cavab matçında da qalib gəlməliyik. Bu oyuna ən yüksək səviyyədə hazırlaşacağıq".

Qeyd edək ki, bu komandalar arasında cavab görüşü martın 23-də keçiriləcək.

Macarıstan A Liqasında 3-cü yeri, Türkiyə isə B Liqasında 2-ci pilləni tutub. Millətlər Liqasının reqlamentinə əsasən, A Liqasında 3-cü yeri tutan 4 komanda B Liqasında 2-ci yeri tutan 4 komanda ilə pley-offda qarşılaşır. Cütün qalibləri növbəti mövsüm A Liqasında, məğlub olanlar B Liqasında yarışacaq.