Vidadi Rzayev: "Qarabağ" "Şkendiya"nı Bakıda da məğlub edə bilər

"Oyun "Qarabağ"ın tam üstünlüyü ilə keçdi".

İdman.biz xəbər verir ki, bu sözləri AZƏRTAC-a açıqlamasında "Qarabağ"ın sabiq futbolçusu Vidadi Rzayev Azərbaycan çempionunun UEFA Çempionlar Liqasının III təsnifat mərhələsində Şimali Makedoniyadan "Şkendiya" klubunu 1:0 hesabı ilə məğlub etdiyi ilk oyun barədə danışarkən deyib.

Mütəxəssis bildirib ki, Ağdam klubunun futbolçuları bir qədər dəqiq olsaydılar, daha böyük hesablı qələbə qeydə alına bilərdi: "Təəssüf ki, Nəriman Axundzadə əlinə düşən fürsətlərdən yararlana bilmədi. Hücum xəttində Juninyonun yeri görünür. O, həqiqətən də Ağdam klubunun "qol silahı" idi. Oyuna gəlincə, "Qarabağ" səviyyə baxımından "Şkendiya"dan çox üstündür. Düzdür, müəyyən səhvlər oldu. Lakin bunu qabartmaq lazım deyil. Bu rəqibi Bakıda da məğlub etmək olar".

Rzayev sabiq komandasının Çempionlar Liqasının əsas mərhələsinə vəsiqə qazanacağına inandığını söyləyib: "Qarabağ" ötən illə müqayisədə bu mövsüm daha güclüdür. Komandamız pley-off mərhələsində potensial rəqibləri olan "Ludoqorets" və "Ferensvaroş"u daha əvvəl məğlub edib. Düzdür, macarlar hər zaman bizim komandalara çətinlik yaradırlar. Lakin bu il "Qarabağ"ın Liqa mərhələsinə yüksələcəyinə çox inanıram".

Qeyd edək ki, komandalar arasında cavab oyunu avqustun 12-də Tofiq Bəhramov adına Respublika Stadionunda keçiriləcək.

İdman.biz