Vidadi Rzayev: "Kəpəz"in əsas problemi keçmiş rəhbərliyindədir

"Adil Şükürov 2023-24 mövsümündə "Kəpəz"i Premyer Liqada saxlamağı bacardı. Amma hamı deyirdi ki, yaxşı məşqçi deyil".

Bunu İdman.biz-ə Azərbaycan millisinin sabiq futbolçusu Vidadi Rzayev deyib.

O, Adil Şükürovun yenidən "Kəpəz"in "sükanı arxasına" keçməsinə münasibət bildirib. Rzayevin sözlərinə görə, komanda əsas problem məşqçilərdə deyil, rəhbərlikdədir: "Kəpəz" Premyer Liqaya vəsiqə qazandığı zaman komandanın baş məşqçisi Yaşar Vahabzadə idi. Həmin vaxt 1-2 futbolçu istisna, düzgün transfer siyasəti aparıldı. Daha sonra o, komandadan göndərildi və yerinə Tərlan Əhmədov gətirildi. Yekunda "Kəpəz" aşağı liqaya düşmədi. Ardınca komanda Azər Məmmədova həvalə edildi. Yeni transferlər olundu, o da klubdan ayrıldı. Sonra Adil Şükürov "Kəpəz"i Premyer Liqada saxladı və Gəncə təmsilçisi onunla yolunu ayırdı. Bu proses həmişə belə davam edir. Şükürovun daha əvvəl niyə uğurlu olmadığını isə keçmiş rəhbərlikdən soruşmaq lazımdır. Onlara sual verilməlidir ki, gəlirlər komandanı liqada saxlayırlar və göndərilirlər. Bir məşqçiyə 6-7 ay ərzində qiymət vermək olmaz. Deməli, rəhbərlikdə problem var. Son mövsümdə Azər Bağırov da komandanı liqada saxlasa da, getdi. Pis məşqçidir? Mən onun qalmasının tərəfdarı idim. Çünki əziyyət çəkmişdi. Hətta Tərlan Əhmədov da qalmalı idi. Lakin eyni ssenarini bütün məşqçilər üzərində oynayırlar. Hər kəs deyir ki, komandada İlqar Nadirinin (indiki "Kəpəz"in icraçı-direktoru – red.) böyük əziyyəti var. Onun nə əziyyəti var ki? Əziyyəti çəkən baş məşqçidir".

Veteran futbolçu yeni çalışdırıcıya uğurlar arzulayıb. O bildirib ki, klubda işləyən məşqçilərin heç biri pis məşqçi olmayıb: "Adil Şükürovun uğurlu olub olmamasını isə zaman göstərəcək. Onu komandaya gətiriblərsə, yalnız uğurlar arzu edə bilərik. "Kəpəz"in əsas problemi keçmiş rəhbərliyi olub. Yerdəyişmə etdilər, lakin ssenari hələ də eynidir. Film əməliyyatı davam edir, hələ də kino çəkirlər".

Qeyd edək ki, Adil Şükürov "Kəpəz"in yeni baş məşqçisi təyin olunub. 47 yaşlı mütəxəssislə 2 illik müqavilə imzalanıb.

Mehri Qurban
İdman.biz