Sport24.az
"Millimiz Ukrayna ilə oyunda xoş təəssürat bağışladı". Bu sözləri Sport24.az-a açıqlamasında Vidadi Rzayev deyib.
Azərbaycan milli komandasının keçmiş futbolçusu yığmanın DÇ-2026-nın seçmə mərhələsində Ukraynaya uduzduğu oyunla bağlı fikirlərini bölüşüb:
"Yığmada döyüşkənlik çatmırdı ki, məğlub olsaq da, Ayxan Abbasov bunu qaytara bilib. Bəzi futbolçularların yaşı çoxdur. Nəsil dəyişilməlidi. Aşağı yaş millilərimiz əfsuslar olsun ki, məglub olurlar. Onlar gələcəkdə A komandanın oyunçuları olmalıdırlar. Gələcəyə baxmaqdansa, geriyə boylanmaq lazımdır. Premyer Liqada sayı 12-yə çatdırdılar. Amma əvəzində legioner limitini aradan qaldırdılar. Bunun bizə heç bir faydası olmayacaq. Futbolçu çatışmazlığı var. Aşağı yaş qruplarının demək olar ki, hamısı 5 top fərqi ilə uduzurlar. Gələcəkdə kim oynayacaq? Bu suala cavab verən yoxdur. Mən həmişə yığmada yerli mütəxəssisin çalışmasının tərəfdarı olmuşam. Ayxan Abbasovun işlədiyi qısa müddətdə işinə qiymət vermək tezdir. O, qısa müddətdə komandaya yalnız döyüşkən ruhu qaytara bilib. Amma ümumilikdə yaxşıya doğru heç nə görünmür".
Qeyd edək ki, Azərbaycan millis dünən Polşanın Krakov şəhərində keçirilən görüşdə Ukraynaya 1:2 hesabı ilə məğlub olub.
