Veysəl Rzayevin bıçaqlanması: Yeni təfərrüatlar, dava səbəbi və yanındakı futbolçu

"Kəpəz"in futbolçusu Veysəl Rzayevin bıçaqlanmasının yeni təfərrüatı bəlli olub.

İdman.Biz qafqazinfo.az-a istinadən xəbər verir ki, yarımmüdafiəçi dostunu qorumaq üçün özünü irəli verib.

Belə ki, o, dostu və iki xanımla birlikdə Gəncədəki restoranların birində əylənirmiş. Gecə təxminən 04:00 radələrində isə onlar xanımlarla birgə restoranı tərk ediblər.

İlkin məlumata görə, yolda həmin xanımlardan birinin keçmiş sevgilisi onların qarşısını kəsib. Həmin şəxs Veysəlin dostu ilə mübahisə etdikdən sonra ona bıçaq zərbəsi endirməyə çalışıb. V.Rzayevin dostunu qorumaq üçün özünü irəli verdiyi və bıçağın ona dəydiyi bildirilir.

Nəticədə futbolçu ağır yaralanıb.

Maraqlıdır ki, Veysəlin yanındakı dostu da "Kəpəz"in keçmiş futbolçusu Nihat Fərəcidir. Hazırda o, İkinci liqada mübarizə aparan "Şəki Siti" klubunda çıxış edir.

10:09

"Kəpəz" klubunun futbolçusu Veysəl Rzayevin iştirakı ilə baş vermiş insidentin bəzi təfərrüatları məlum olub.

İdman.Biz-in əldə etdiyi məlumata görə, hadisə gecə saat 01:00 radələrində Gəncə şəhərində baş verib.

Münaqişə zamanı Veysəl Rzayev bıçaq xəsarəti alıb.

İddiaya görə, mübahisə qız üstündə yaranıb. Veysəl Rzayev də həmin dava zamanı hadisəyə qarışıb və bıçaqlanıb. Onun vəziyyəti ağır qiymətləndirilsə də, həyatı üçün təhlükə yoxdur.

Qeyd edək ki, Gəncə Şəhər Birləşmiş Xəstəxanasından gencexeber.az-a verilən məlumata görə, bu gün saat 05:10 radələrində 2002-ci il təvəllüdlü şəxs (kişi) Gəncə Şəhər Birləşmiş Xəstəxanasının nəzdində olan Akademik Z.Məmmədov adına xəstəxananın Təcili tibbi yardım şöbəsinə hospitalizasiya olunub. Ona döş qəfəsinin arxa divarının açıq yarası diaqnozu təyin olunub. Hazırda müalicəsi xəstəxananın Cərrahiyyə şöbəsində davam etdirilir, vəziyyəti orta ağırdır.

Xatırladaq ki, V.Rzayev ötən ilin aprelində də davaya qarışıb. Həmin vaxt "Turan Tovuz"da çıxış edən futbolçu "Səbail"lə 0:0 hesablı oyundan sonra öz komandasının azarkeşləri ilə mübahisə edib. Meydana 19-cu dəqiqədə daxil olan V.Rzayev tribunadan səslənən atmacalara cavab verib və nəticədə insident yaşanıb. Hadisə mühafizəçilərin müdaxiləsindən sonra sakitləşdirilib.

Faktla bağlı hüquq-mühafizə orqanları tərəfindən araşdırmalara başlanılıb.

08:34

Gəncədə futbolçu bıçaqlanıb.

İdman.Biz gencexeber.az-a istinadla xəbər verir ki, hadisə şəhər ərazisində baş verib.

Məlumata görə, 2002-ci il təvəllüdlü Veysəl Rzayev kəsilmiş-deşilmiş yaralarla xəstəxanaya yerləşdirilib. Zərərçəkənə təcili tibbi yardım göstərilib, əməliyyat olunub. Onun vəziyyəti orta-ağır qiymətləndirilir.

Qeyd edək ki, bıçaqlanan şəxs "Kəpəz" futbol klubunun oyunçusudur. O, ötən ay qış transfer pəncərəsi dövründə "Turan Tovuz"dan "Kəpəz"ə transfer olunub.

Faktla bağlı hüquq-mühafizə orqanları tərəfindən araşdırma aparılır. Hadisənin təfərrüatları dəqiqləşdirilir.