Idman.biz
"Neftçi"nin yeni transferi Vensan Abubakarla müqaviləsinin detalları müəyyənləşib.
İdman.Biz futbolinfo.az-a istinadən xəbər verir ki, 33 yaşlı hücumçu "ağ-qaralar"la 1+1 illik müqaviləyə qol çəkəcək.
Hazırda Bakıda olan Kamerun millisinin üzvü tibbi müayinədən keçdikdən sonra keçidi rəsmən elan olunacaq. Abubakarın cari mövsümdəki performansı onun komandada qalıb-qalmayacağını müəyyənləşdirəcək. Çıxışı ürəkaçan olarsa, gələn ilin yayında sözləşməsi avtomatik olaraq 1 illik uzadılacaq.
Abubakarın Azərbaycanda çıxış edən ən yüksək ödənişli futbolçu olması gözlənilir. Konkret rəqəm açıqlanmasa da, onun 1 milyon avrodan az almayacağı güman edilir.
Qeyd edək ki, Abubakar son klubu "Hatayspor"dan bu ilin mayında ayrılıb və "Neftçi"yə azad agent kimi keçib. Ötən müddətə oynamaması üzündən hazırda fiziki hazırlığı qaydasında deyil.
