Idman.biz
"Ümid edirəm ki, çempion "Betis" olacaq".
Bunu İdman.biz-ə veteran futbolçu Vəli Qasımov deyib.
O, bu gün baş tutacaq UEFA Konfrans Liqasının final matçından danışıb. Qasımov bildirib ki, vaxtilə formasını geyindiyi İspaniyanın "Betis" komandasının qələbəsinə inanır: "Betis"in keçmiş oyunçusu kimi bu komandaya çoxdan azarkeşlik edirəm. Onların finala çıxması məni çox sevindirir. Ancaq nəzərə almaq lazımdır ki, rəqib "Çelsi" də çox güclüdür və favoritdir. Yenə də İspaniya təmsilçisinin qalib gələcəyinə inanıram. Bu gün "Betis" çox işlər görür. Akademiyadan tutmuş, əsas komandaya kimi".
O, sabiq komanda yoldaşları ilə bu gün də əlaqə saxladığını qeyd edib: "Mənimlə bir vaxtda oynayan futbolçuların bəziləri bu gün "Betis"də işləyir. Hər dəfə İspaniyaya gedəndə çalışıram ki, onlarla ilə görüşüm. Çox vaxt məni ya komandanın, ya da veteranların oyununa dəvət edirlər. "Betis"in azarkeşləri tamam başqadır. Komanda uduzanda da, udanda da sevimli komandalarını dəstəkləyirlər. Bugünki gündə belə hallar az olur, hər kəs nəticəyə baxır. O azarkeşlər isə nə olursa olsun, komandanın yanındadırlar. "Betis" ə uğurlar arzulayıram".
Qeyd edək ki, Polşanın Vrotslav şəhərində baş tutacaq "Betis" - "Çelsi" finalı bu gün Bakı vaxtilə saat 23.00-da başlayacaq.
Aytac Sahəd
İdman.biz
