Sport24.az
Şamaxı Regional Futbol məktəbinin koordinatoru Vəli Qasımovun Sport24.az-a müsahibəsi
- 2024/2025 mövsümünü Şamaxı Regional Futbol məktəbi üçün necə dəyərləndirirsiniz?
- Uşaqlar yetişir. Əsasən də aşağı yaş qrupları. Böyük yaşlarda uşaqlar demək olar ki, yox idi. Çətinliklə yığmışıq. Bununla bağlı bir az əziyyət çəkirik. Azyaşlılar isə yaxşıdır. Böyüyürlər, inkişaf gedir. İnanıram ki, yaxşı nəticələr olacaq.
- Aşağı yaş qruplarını qabartdınız. İstedadlı oyunçular çoxdur?
- Həqiqətən çox yaxşıdırlar. Ağsu zonasında oynayırıq. Demək olar ki, əksər matçlarda qələbə qazanırıq. Amma bizim əsas məqsədimiz əltəbbə ki, uşaqları yetişdirməkdir. Onları düzgün yönəltmək lazımdır. Yerində baxsanız, inkişafın getdiyini görəcəksiniz.
- Çoxları Şamaxının futbol bölgəsi olmadığını düşünür. Siz artıq neçə ildir ki, oradasınız. Bu bölgə ölkə futboluna tanınmış simalar verə biləcəkmi?
- Əminəm ki, 4-5 ildən sonra Şamaxıdan olan futbolçular milli komandamızda çıxış edəcəklər. Burada potensiallı oyunçular var. İnanıram ki, onlar daha yuxarı səviyyələrə çatacaqlar. İlk növbədə iş davam etməlidir. Ondan sonra necə futbolçuların çıxdığını birlikdə görəcəyik.
- Aşağı yaş qruplarında nəticə elə də önəm kəsb etmir. Amma gənclər qalib gəlməyə meyillidirlər. Qarşıdakı illərdə hansısa komandanız çempionluğa oynaya bilərmi?
- Çempionluğa oynamağımız çox çətin olacaq. Çünki bəzi klublar nəticəyə oynayırlar. Onların imkanları var. Şəraitləri mövcuddur, qida verə bilirlər. Onlar Azərbaycanın digər bölgələrindən uşaqlar cəlb edirlər, saxlayırlar. Nəticəni belə komanda göstərə bilir. Bizdə isə sırf Şamaxıdan olan uşaqlardır. Zəif də olsa, onları oynadırıq. Məqsədimiz digər klublara baxanda bir az ayrıdır. Klublarımızda digər bölgələrdən gələnlərdən çoxdur. Bizim bütün yaş qruplarımızdakı uşaqlar Şamaxıdandır. Böyüklərə məşq keçməmişik, sadəcə, onları yığmışıq. Nəticə göstərə, oynaya bilmirlər. Amma azyaşlılarda inkişaf gedir.
- Misli Premyer Liqasında çıxış edən "Şamaxı"nın əsas komandasında da bir neçə azərbaycanlı gənc oyunçu əsas heyətdə yer alır...
- Ayxan Abbasov U-21 millimizin də baş məşqçisi təyin olunub. İndi daha çox gənc futbolçuları cəlb edəcəklər. Bu da ölkə futbolu üçün çox yaxşı amildir. Əlbəttə, heyətdə legionerlər də yer alacaq. Gənc futbolçular əcnəbilərin yanında oynayanda daha çox inkişaf edirlər. Hazırda gənclərə ən çox şans verən də "Şamaxı" komandasıdır. Şamaxı futbolu gündən-günə inkişaf edəcək. Ayxan müəllim cavanları daha çox oynadacaq.
