Sport24.az
"İkinci Liqada qalmaq üçün son oyunda mütləq "Lerik"ə qalib gəlməliyik. Rəqibə isə heç-heçə də sərf edir. Sonuncu matçda bunu nəzərə alıb əsas heyəti qoruduq. Bütün komanda "Lerik"lə oyuna köklənib. İstəməzdik şansımız sonuncu tura qalsın". Bu sözləri Sport24.az-a açıqlamasında "Füzuli"nin təsisçilərindən biri olan Vasif İsmayılov deyib.
O, komandasının uğursuz nəticələrinə görə özünü də günahlandırıb:
"Füzuli" hansı liqada oynayıbsa, birinci yer uğrunda mübarizə aparıb. Bu da bir qismətdir. Mövsümün əvvəlində ilk "3-lüy"ə oynayası bir heyət yığmışdıq. Birinci dövrə yekunlaşmamış bəzi futbolçuları klubdan uzaqlaşdırdıq. İkinci dövrədə isə ehtiyat heyətin 5-6 futbolçusu ilə çempionatı davam etdirdik. Maaşlar vaxtında verilib. Rəhbərlik tərəfindən nə lazımdısa olunub. Futbolçular isə üzərlərinə düşən öhdəliyi yerinə yetirmədilər. Dövlət işimə görə birinci dövrədəki oyunlara qatıla bilmirdim. Komandanı klubun içində olan şəxslərə həvalə etmişdim. İkinci dövrədə isə bütün oyunlarda məşqçi, rəhbər, administrator kimi kömək edirəm. Bütün məsuliyyəti oyunçuların üzərinə atmaq istəmirəm. 30 faiz də mənim günahım var idi ki, matçlara gələ bilmirdim. Bəlkə də davamlı olaraq getsəydim, fərqli ola bilərdi".
Qeyd edək ki, "Füzuli" İkinci Liqada 25 turdan sonra 15 xalla sonuncudur.
