Sport24.az
"Milli komanda ilk oyuna çıxır. İslandiya bizə uyğun rəqibdir. Onlar kağız üzərində favorit hesab oluna bilərlər, amma yığmamıza inamımız böyükdür". Bu sözləri Sport24.az-a açıqlamasında Vaqif Sadıqov deyib.
Məşqçilər Komitəsinin sədri yığmanın səfərdə İslandiyaya qarşı keçirəcəyi DÇ-2026-nın seçmə mərhələ oyunu ilə bağlı fikirlərini bölüşüb:
"İlk oyunda uğurlu nəticə qazanmaq psixoloji cəhətdən vacib amildir. Bizi maraqlı matç gözləyir. Fernandu Santuş və onun komandası qarşılaşmanın əhəmiyyətini dərk edir. Hazırlıq dövründə uğurlu nəticə qazana bilmədik. Bu isə rəsmi oyundur. Tam başqa motivasiya olacaq. Santuş bundan öncəki oyunlarda heyətdə hansısa dəyişiklərə əl atırdısa, bu matçda optimal heyəti formalaşdıracaq. Legioner limitinin ləğvi gec-tez baş verməli idi. Bunun nə qədər faydalı olub-olmadığını zaman göstərəcək. Premyer Liqanın ilk turlarında böyük fərqi hiss etmədik. Əsas heyətdə oynamağı haqq edənlər yenə forma geyinmək şansı qazandılar. Yerli futbolçuların üzərinə düşən güclü olduğunu sübut etmək və rəqabətdən qalib ayrılmaqdır".
Qeyd edək ki, sentyabrın 5-də keçiriləcək İslandiya - Azərbaycan matçı Bakı vaxtı ilə saat 22:45-də start götürəcək.
