İdman.biz
"Bu nəticə mənim üçün heç də təəccüblü olmadı".
Bunu İdman.bizə AFFA-nın sabiq vitse-prezidenti Vaqif Sadıqov deyib.
Təcrübəli mütəxəssis "Qarabağ"ın Çempionlar Liqasının III təsnifat mərhələsində "Lüdoqorets"lə cavab oyunda 7:2 hesablı qələbəsini dəyərləndirib. O, pley-offa yüksələn Azərbaycan çempionunun rəqibdən səviyyə və keyfiyyət baxımından qat-qat üstün olduğunu deyib: "Bakıda yaradılan vəziyyətləri qola çevirə bilmədik. Amma bunun qarşılığını Bolqarıstanda verdik, rəqibdən üstün olduğumuzu göstərdik. "Qarabağ" öz şousunu davam etdirir".
O, "Qarabağ"ın pley-offdakı rəqibini də çox güclü hesab etmir: "Azərbaycan çempionu o gücdədir ki, bizi hər bir oyunda sevindirə biləcək. Pley-off çətin mərhələdir. Lakin Zaqreb "Dinamo"su "Lüdoqorets"dən güclü bir rəqib deyil. Vacib olanı odur ki, "Qarabağ" hər bir rəqibə qarşı mübarizə aparacaq gücdədir. Azərbaycan çempionu istədiyi rəqibə lazımı qolu vurub, yoluna davam edə bilər".
Qeyd edək ki, "Qarabağ" Bakıdakı qarşılaşmada "Lüdoqorets"ə 1:2 hesabı ilə məğlub olmuşdu.
Banuçiçək Hüseynli
İdman.biz
