Report.az
AFFA Məşqçilər Komitəsinin sədri Vaqif Sadıqov Azərbaycan Kubokunun "Qarabağ" və "Sabah" arasında keçirləcək final matçında komandaların şanslarını bərabər hesab edib.
Mütəxəssis bunu "Report"a açıqlamasında bildirib.
O, futbolsevərləri maraqlı və gərgin oyun gözlədiyini söyləyib:
"Kubokda həmişə şanslar bərabər olur. Baxmayaraq ki, hər komandanın öz üstünlükləri var. Bilirik ki, "Qarabağ"ın öz oyun tərzi var. Çempionluğu bir neçə tur əvvəldən təmin ediblər. Hazırda "qızıl dubl"a imza atmaq istəyirlər. Unutmayaq ki, "Sabah" da ilki gerçəkləşdirmək üçün meydana çıxacaq. Bizi sona qədər gərgin və maraqlı oyun gözləyir".
V.Sadıqov "Sabah"ın motivasiyalı, "Qarabağ"ın isə təcrübəli olduğunu vurğulayıb:
"Proqnozlar kağız üzərində qalacaq. "Sabah" motivasiya baxımından üstündür. "Qarabağ" isə təcrübəli komandadır. Fikrimcə, hər iki komandanın futbolçuları bu görüşü səbirsizliklə gözləyirlər. Güclü qalib gəlsin və Avropada bizi layiqincə təmsil etsin. Hər iki komandaya uğurlar arzulayıram".
Qeyd edək ki, "Qarabağ" - "Sabah" matçı mayın 31-də, saat 19:00-da Sumqayıt şəhər stadionunda keçiriləcək.
