Sport24.az
"İlk növbədə onu qeyd etməliyik ki, Premyer Liqada mövsümün başa çatmasına az qalıb. Bu səbəbdən hər oyun önəmlidir. Bu görüş də hər bir komanda üçün vacibdir. Bu sözləri Sport24.az-a Vaqif Sadıqov deyib.
Təcrübəli mütəxəssis Misli Premyer Liqasının XXVIII turunda bu gün keçiriləcək "Neftçi" - "Araz-Naxçıvan" oyunu ilə bağlı fikirlərini bölüşüb:
"Neftçi" son matçlarda müsbət nəticələr əldə etməklə psixoloji durumunu yüksək səviyyəyə çatdırmaq istəyəcək. Çünki ölkə kubokunu qazanmaq üçün imkanları var. "Araz-Naxçıvan" isə ən azından avrokuboklar zonasında qalmaq üçün mübarizə aparır. Hər bir xal itkisi onlara baha-başa gələ bilər. Hesab edirəm ki, maraqlı və gərgin oyuna şahidlik edəcəyik. Hər kollektivin öz planları var. Azərbaycanı avrokuboklarda təmsil etməyi planlaşdırırlar. "Neftçi"nin çempionat yolu ilə bunu əldə etməsi çox çətin olacaq. Amma özünə inamı, əzəməti qaytarmaqla Azərbaycan Kubokundakı matça inamlı çıxmaq istəyir. Məhz bir neçə gündən sonra "Sabah" kimi çətin rəqiblə yarımfinalda üz-üzə gələcək. Məncə, psixoloji durumu yaxşı saxlamaq üçün bu gün müsbət nəticə əldə etməyə çalışacaq.
Sadıqov "Araz-Naxçıvan"ın son dönəmlərdə stabil çıxış etməməsinə də toxunub: "Bunun obyektiv və subyektiv səbəbləri var. Məncə, zədələr və cəzalar komandaya mane oldu. Elmar Baxşıyev hər qarşılaşmada tam heyətlə meydana çıxa bilmədi".
Qeyd edək ki, bu gün baş tutacaq "Neftçi" - "Araz-Naxçıvan" matçı saat 16:45-də start götürəcək.
