İdman.biz
"Hər birimiz "Qarabağ"dan uğurlu və məzmunlu oyun gözləyirik".
Bunu İdman.bizə AFFA-nın sabiq vitse-prezidenti Vaqif Sadıqov deyib.
Təcrübəli mütəxəssis "Qarabağ"ın Çempionlar Liqasının III təsnifat mərhələsində "Lüdoqorets"lə (Bolqarıstan) oyununu şərh edib. Sadıqov sabah baş tutacaq görüşdə Azərbaycan çempiona inandığını bildirib: "Komandanın son illərdə göstərdiyi performans bunu deməyə əsas verir. Hər 2 görüşdə üstün tərəf "Qarabağ" olacaq. Ümid edirəm ki, hər birimiz sabah sevinəcəyik. "Qarabağ" daim hər bir rəqibə hörmətlə yanaşır. Təbii ki, bu, 3-cü mərhələdir və tamam başqa səviyyədir. Lakin yaddan çıxarmamalıyıq ki, "Qarabağ" özünə məxsus oyun tərzi ilə bu cütün qalibi olacaq. Ağdam klubunun bu mərhələdə də ən yaxşı oyununu göstərəcək. Təbii ki, bolqarlar əvvəlkilərdən daha güclüdür və görüş gərgin keçə bilər. Biz dəfələrlə şahid olmuşuq ki, "köhlən atlar" güclü komandaya qarşı ümidləri doğruldub".
Qeyd edək ki, "Qarabağ" və "Lüdoqorets" arasında ilk matç avqustun 6-da Tofiq Bəhramov adına Respublika stadionda keçiriləcək.
Banuçiçək Hüseynli
İdman.biz
