Report.az
"Qarabağ" "Kopenhagen"ə qarşı ən gözəl oyunlarından birini sərgiləyəcək.
Bu barədə "Report"a AFFA Məşqçilər Komitəsinin sədri Vaqif Sadıqov açıqlama verib.
Təcrübəli mütəxəssis Azərbaycan təmsilçisinin UEFA Çempionlar Liqasının əsas mərhələsinin II turunda Bakıda keçirəcəyi matçla bağlı fikirlərini bölüşüb:
"Qarabağ"ın bu turnirdəki qarşılaşmaları asan keçmir. "Benfika" ilə tarixi səfər qələbəsindən sonra rəqiblər təmsilçimizə qarşı daha ciddi hazırlaşacaqlar. Çünki heç biri Portuqaliya klubunun aqibətini yaşamaq istəmir. "Kopenhagen"lə matçda Azərbaycan çempionuna ümidimiz böyükdür. İnanıram ki, komandamız bu maçtda da ən gözəl oyunlarından birini sərgiləyəcək".
V.Sadıqov "Qarabağ"ın ilklərə imza atan kollektiv olduğunu söyləyib:
"Qarabağ" ilklərə imza atan komandadır. Bu qarşılaşma təmsilçimizin turnir cədvəlindəki yeri baxımından da önəm daşıyır. "Qarabağ" qələbə qazanacağı təqdirdə minimum vəzifənin öhdəsindən gəlmiş olacaq. Ağdam təmsilçisi Avropada sayılıb-seçilən komandalardan biridir. Qurban Qurbanovun yetirmələrini çox tərifləyib, gözə gətirmək istəmirəm. "Qarabağ" gözəl oyunla hər kəsə sevinc bəxş edir".
Qeyd edək ki, "Qarabağ" - "Kopenhagen" oyunu oktyabrın 1-də, saat 20:45-də Tofiq Bəhramov adına Respublika stadionunda start götürəcək.
UEFA Çempionlar Liqası əsas mərhələ II tur "Qarabağ" - "Kopenhagen" oyunu
