Idman.biz
"Çempionatımız çox maraqlı keçir".
Bunu AFFA Məşqçilər Komitəsinin sədri Vaqif Sadıqov İdman.biz-ə açıqlamasında deyib.
O, Azərbaycan Premyer Liqasında geridə qalan XXXI turunu dəyərləndirib. Mütəxəssis bildirib ki, avrokuboklara vəsiqə uğrunda gedən mübarizə çempionata xüsusilə rəng qatır: "Son turda da güclülərin öz imicini qoruyub saxlamalarının şahidi olduq. Bunu həm "Qarabağ"a, həm də "Zirə"yə aid etmək olar. İlk turdan özünü yaxşı göstərən "Zirə"nin adını xüsusilə qeyd etmək istərdim. Planlı şəkildə fəaliyyət göstərən komandanın artıq özünəməxsus oyun tərzi var. Həmçinin oyundan-oyuna inkişaf edən və heyətində gənc futbolçulara yer verən "Şamaxı" uğurlu nəticələri ilə bizi təəccübləndirir. "Kəpəz" də son dövrlər yaxşı performansı ilə fərqlənir. Komanda çətin durumda olmasına baxmayaraq, çıxış yolunu tapıb elitanı tərk etmək zonasından uzaqlaşdı. Bəlkə də bu tura qədər "Səbail"in haradasa Premyer liqada qalacağını güman etmək olardı. Ancaq bu turdan sonra komandanın nəzəri tərəfdən şanslar olsa da, Premyer Liqada qalmaq məsələsi onlar üçün çox çətin görünür. Avrokuboka düşmək üçün komandalar arasında çox gərgin mübarizə gedir. Məncə, sona qədər bu gərginlik azalmayacaq. Çünki "Qarabağ" və "Zirə"nin avrokuboklara gedcəəyini indidən təxmin etsək də, digər iki komandanın adını indidən demək mümkün deyil. Bu da mübarizənin gərginiliyini daha da artırır".
Sadıqov Misli Premyer Liqasının XXXI turuna təsadüf edən Azərbaycan derbisi - "Qarabağ" - "Neftçi" matçı haqqında da fikirlərini bölüşüb: "Bu matçı səbirsizliklə gözləsək də, təəssüf ki, istədiyimiz kimi maraqlı mübarizənin şahidi olmadıq. Fikrimcə, derbi ümumiyyətlə, alınmadı. Bunun da müxtəlif səbəbləri var. Əsas səbəb odur ki, bir tərəf digərindən qat-qat üstün idi. Çox güman "Neftçi" Azərbaycan kubokunda "Sabah"la cavab oyununa fokuslandığı üçün bu qarşılaşmada potensialını tam şəkildə göstərə bilmədi. Düşünürəm ki, "Sabah" - "Neftçi" matçı həddindən artıq maraqlı və gərgin keçəcək".
Qeyd edək ki, tur çərçivəsində "Araz-Naxçıvan" "Turan Tovuz"la (1:1) heç-heçə oynayıb, "Şamaxı" "Kəpəz"ə (2:1), "Sabah" "Səbail"ə (3:2), "Qarabağ" "Neftçi"yə (3:0) və "Zirə" "Sumqayıt"a (3:1) hesabı qalib gəlib.
Aytac Sahəd
İdman.biz
