Sport24.az
"Həmişəki kimi klublarımız yay transfer dönəmində fəal təsir bağışlayırlar". Bu sözləri Sport24.az-a açıqlamasında Vaqif Heydərli deyib.
Tanınmış agent yay "transfer pəncərəsində" daha çox "Araz-Naxçıvan", "İmişli", "Karvan" və "Neftçi"nin daha aktiv olduğunu bildirib:
"Araz-Naxçıvan", "İmişli" və "Karvan" "Neftçi"nin say etibarilə başqa klublardan fərqləndilər, daha çox transferlər etdilər. Təbii ki, elitanın digər təmsilçiləri də heyətlərini gücləndirmək yönündə addımlar atdılar. Ancaq kəmiyyət baxımından adlarını qeyd etdiklərim daha çox fərqləndi. Keyfiyyət baxımından necə olacağını isə zaman göstərəcək. Yeni transferlərin nəyə qadir olduğunu görmək üçün bir müddət gözləmək lazımdır. Fikrimcə, XXXIV ölkə çempionatı maraqlı və gərgin idman mübarizəsi şəraitində keçəcək. Bunu klublarımızın transferlərindən də görmək mümkündür".
"Yeni mövsümdə favorit hansı klubdur" sualına gəlincə, məncə, bu sual ətrafında çox baş sındırmağa dəyməz. Ötən illərdə olduğu kimi "Qarabağ" hamıdan bir addım öndədir. Ancaq bu il ağdamlıları asan mübarizə gözləmir. Rəqabət güclü olacaq".
Qeyd edək ki, Premyer Liqada yeni mövsümə sabah keçiriləcək "İmişli" - "Turan Tovuz" matçı ilə start veriləcək.
