Idman.biz
Çempionlar Liqasının əsas mərhələsində keçiriləcək "Qarabağ" - "Ayaks" görüşünə sayılı saatlar qalıb.
Qarşılaşma ilə bağlı müxtəlif proqnozlar səslənərkən, həm Niderland futbolunu, həm də "Qarabağ" klubunu dərindən tanıyan Vaqif Cavadov öz fikirlərini İdman.Biz-lə bölüşüb.
Hazırda "Sumqayıt" futbol klubunun əvəzedicilərinin baş məşqçisi olan sabiq hücumçu futbolçu kimi həm "Qarabağ"ın, həm də "Tvente"nin formasını geyinib və sonuncu klubla Niderland çempionu olub.
Cavadov ailəsi ilə birlikdə sabahkı matçı stadiondan izləyəcəyini bildirib:
"Qarabağ"a stadionda bütün ailəlikcə azarkeşlik edəcəyik. Dörd bilet almışam, sabah axşam həyat yoldaşım və iki övladımla birlikdə oyuna gedəcəyik. Əminəm ki, "Qarabağ" bizi sevindirəcək və bu matçda qalib gələcək. Bəli, "Ayaks"da vəziyyət heç də yaxşı deyil, amma bu komanda böyük ənənələrə və özünəməxsus oyun üslubuna malikdir. Mən həmçinin inanıram ki, Çempionlar Liqasının əsas mərhələsində hələ də xal qazanmayan "Ayaks" tezliklə özünə gələcək, amma ümid edirəm ki, bu, sabahkı oyunda baş verməyəcək! "Qarabağ"dan 2:1 hesablı qələbə gözləyirik", - deyə o vurğulayıb.
Xatırladaq ki, "Qarabağ" - "Ayaks" oyunu dekabrın 10-da Tofiq Bəhramov adına Respublika Stadionunda keçiriləcək və saat 21:45-də start götürəcək.
Vüqar Vüqarlı
