Idman.biz
"Azərbaycan futbolunun yaxşı vəziyyətə gəlməsi üçün iki amil vacibdir. Bunlar uşaq futbolu və təhsildir".
Bunu sportnet.az-a açıqlamasında Azərbaycan millisinin sabiq futbolçusu Vaqif Cavadov deyib.
Hazırda "Sumqayıt"ın əvəzedicilərdən ibarət komandasında baş məşqçi postunu tutan keçmiş hücumçu bildirib ki, futbolçular üçün klubu, təhsil aldığı orta məktəb və ali məktəb arasında çox böyük dilemma yaranıb: "Futbolçularımdan 5-i ikinci növbə, digərləri birinci növbə təhsil alırlar. Mən 5 futbolçunu necə məşq elətdirim? Məcburam ki, onları U-17 komandanın heyətində məşqlərə göndərim. Çünki dərsə gecikirlər, çatdırmırlar".
Cavadovun sözlərinə görə, belə hal təkcə "Sumqayıt"da deyil, digər klublarımıza da aiddir. O, çıxış yolunu internat tipli məktəblərin yaradılmasında və klublar arasında dialoqda görüb: "Biz bazar ertəsi gününə oyun sala bilmirik. Çünki futbolçular dərsdə olurlar. Tutaq ki, uşaq futbolçular klub akademiyalarında təhsil aldılar. Bəs ali məktəbə girdikdən sonra necə olmalıdır? Azərbaycan İdman Akademiyası ilə əməkdaşlığı klublar yox, AFFA etməlidir. Aqil Nəbiyev də dedi ki, U-17 yığmasına 5 futbolçu gəlsəydi, onlar Avropa çempionatının final mərhələsinə yüksələcəkdilər. Amma onları öz təhsil müəssisələri buraxmadı".
Baş məşqçi əsgərlik probleminə də diqqət çəkib: "Biz 17-18 yaşınadək futbolçu yetişdiriririk. Sonra isə 1,5 il müddətinə əsgərliyə gedirlər. Nəticədə 10 il çəkdiyin əziyyət yox olur. Halbuki onun istedadı da var, futbolçu bacarığı da. Amma əsgərlikdə hamısı batır. Axı klubu ona 10 il ərzində maddi və digər aspektlərdə dəstək olub. U-19 yığmasına düşsən belə, orada daimi qalacağına təminat yoxdur. Çünki futbolçu bu gün milliyə layiq oyun göstərə bilər, sabah isə yox. Həm də ki, futbolçuların hamısı milliyə düşə bilməz".
