Sport24.az
"Rəqibi qələbəyə görə təbrik edirəm və uğurlar arzulayıram. Matç haqqımda çox danışmayacağam. Hər şeyi gördünüz. İnanıram ki, düzgün və ədalətli yazılar olacaq. Həm hakimlərlə, həm də oyunla bağlı təhlil etsəniz, daha yaxşı olar. Başqa nəsə deməyə ehtiyac yoxdur".
Sport24.az xəbər verir ki, bu fikirləri "Sumqayıt"ın baş məşqçisi Vaqif Cavadov "Neftçi"yə səfərdə 0:1 hesabı ilə uduzduqları Misli Premyer Liqasının XXIV turunun oyunundan sonra mətbuat konfransında deyib.
Mütəxəssis daha sonra jurnalistlərin suallarını cavablandırıb...
- Siz özünüz nə fikirdəsiniz?
- Gördüklərim var. İndi desəm, ya cəza alacağam, ya da intriqaya səbəb olacaq. Jurnalistlərin ədalətli yazılarınızı oxuyuruq. Düzgün analiz edib, oyunumuzla bağlı təhlil edə bilərsiniz. Oyundan razıyam və komandama təşəkkür edirəm. Qarşıdakı oyuna hazırlaşcağıq. Ümid edirəm hər şey yaxşı olacaq.
- Hakimlikdən narazı qaldınız?
- Siz təhlil edin. Son 10 dəqiqəyə baxın. Meydanda hansı qərarlar verildiyini görəcəksiniz. 100 faizlik penaltimiz verilmədi. Hakimlərdən danışmaq niyyətində deyiləm. Məğlub olduq. Sizdən xahiş edirəm, təhlil edin, qiymət verin. Bəlkə də kimlərsə cəzasını alacaq.
- Aydındır ki, hakimlərdən çox narazısınız.
- 80-ci dəqiqəyədək qol epizodlarımız var idi. Yararlana bilmədik. Daha çox çalışacağıq. 80-ci dəqiqəyə qədər olan epizodlar "Sumqayıt"ın xeyrinə idi.
- Buna hava şəraiti də təsir etdi?
- Hər iki komanda üçün eyni şərait idi. Planlarımızı heç nə pozmadı. Hazır idik. Bugünkü oyun da onu göstərdi ki, hər cəhətdən koamndam üstün idi.
- Bundan əvvəlki oyunları götürsək, belə görürük ki, sizin rəhbərliyiniz altında komanda ilk hissəni daha yaxşı göstərir. İkinci hissə eniş var. Belədir?
- Razıyam. Digər oyunlarda elədir. Amma sonradan meydana buraxdığımız oyunçular hazır gəlməyib. Bəzilərində 1-2 ay keçib. Amma birdən-birə onları yüksəlsək, yenidən zədələnəcəklər. Ronaldo, Momo Yansane də həmçinin. Bu yöndə çalışırıq. Bugünkü oyunda 90 dəqiqə ərzində pressinq etdik, qol imkanlarımız oldu. Bəzi səbəblərə görə uduzduq. Futboldur. Artıq danışmağa, növbəti matça hazırlaşmaqlıyıq.
- 9 oyundur qol vura bilmirsiniz. Ötən dəfə cadu məsələsini dediniz. Bəs, göstərdiyiniz oyunla heç əlaqəsi yoxdur qol vurmamağın?
- Cadu? Dilə gətirməmişəm. Bilirik ki, bu ifadə yarı zarafat, yarı emosiya ilə deyilib. Qol vura bilmiriksə, problem var. Qollar görürük...VAR-da olan hakimlər bəzi epizodlarda görmürsə...Komandamdan razıyam. Bəziləriniz deyəcəksiz,uda bilmirik. Futboldur. Ruhdan düşmürük. Çempionat gərgin keçir. İnanıram ki, vəziyyətdən çıxacağıq.
- Kubok matçınız da var. İndiki "Sumqayıt" "Sabah"ı keçə bilər?
- Birinci oyun göstərdi ki, biz keçə bilərik. Bu gün də yaxşı mübarizə apardıq. "Sabah"la birinci oyun imkan verir ki, mərhələ adlayaq. Hansı komanda uğurlu, istəkli olacaq, mərhələ adlayacaq. Kubokda qolla bağlı hər şey qaydasında olacaq.
