Idman.biz
"Qərarı bu gün qəbul etdik".
Bunu İdman.biz-ə "Sumqayıt"ın sabiq baş məşqçisi Vaqif Cavadov deyib.
O, "Gənclik şəhəri" təmsilçisi ilə yollarını ayırmasına münasibət bildirib. Cavadovun sözlərinə görə, rəhbərliklə müzakirə etdikdən sonra bu qərarı qəbul ediblər: "Bundan sonra da fəaliyyətimi "Sumqayıt"da davam etdirəcəm. Hələlik istirahət etməyi düşünürəm, sonra da PRO kateqoriyası üçün dərslərim var. Həm o, həm də "Sumqayıt" futbol klubunda çalışmağa davam edəcəm. Əlbəttə ki, biz məşqçiyik, əgər bu peşədəyiksə, bu gün bu klubdasan, sabah digər klubda ola bilərsən. Təkliflər olsa, niyə də yox? Ancaq hələlik fəaliyyətimi "Sumqayıt"da davam etdirəcəm".
O vurğulayıb ki, baş məşqçi olmaq heç də tələsik addım atmayıb: "Tələsdiyimi düşünmürəm, əlli yaşında başlamayacaqdım ki. Hər şey bir təcrübədir. "Sumqayıt" klubunun rəhbərliyinə minnətdarlığımı bildirirəm ki, bu şansı mənə verdilər. Əgər komanda Premyer Liqada qalıbsa, deməli, bu işdə mənim də rolum olub".
Qeyd edək ki, Vaqif Cavadov bütün turnirlər daxil olmaqla "Sumqayıt"ı 28 oyuna çıxarıb (25 Premyer Liqa, 3 Azərbaycan Kuboku). Bu matçlarda komanda 7 qələbə, 6 heç-heçə və 15 məğlubiyyətlə yadda qalıb.
Aytac Sahəd
İdman.biz
