Idman.biz
İspaniyanın "Valensiya" klubunun stadionu "Mestalya"da 5-ci sektorda oturan abunəçinin bir ildən artıq müddətdə futbolçulara qarşı rasist və homofob ifadələr işlətməsi ilə bağlı açılan cinayət işi sürətlənib.
İdman.Biz xəbər verir ki, məsələ artıq iki istiqamətdə araşdırılır: prokurorluq xətti ilə və klubun daxili intizam prosesi çərçivəsində.
Sənədlər və audiofayllar hazırda Prokurorluq tərəfindən araşdırılır. Əgər ifadələr nifrət cinayəti (İspaniya Cinayət Məcəlləsinin 510-cu maddəsi) və ya mənəvi bütövlüyə qarşı cinayət kimi qiymətləndirilərsə, iş təhqiqat üçün müstəqil məhkəməyə ötürüləcək. Məhkəmə cinayətin sübuta yetirildiyini təsdiqləsə, azarkeş 6 aydan 2 ilə qədər azadlıqdan məhrumetmə, həmçinin gəlirinə uyğun hesablanan cərimə ilə üzləşə bilər. Mənəvi bütövlüyə qarşı cinayətdə isə cəza daha ağır olur və "yaxınlaşma qadağası" kimi əlavə tədbirlər də tətbiq oluna bilər.
"Valensiya" klubu da hadisə ilə bağlı intizam işi açıb. Klub 5-ci sektor azarkeşinin və onun təhqirlərində iştirak edən qardaşının abunəliyini ləğv etmək və stadiondan uzaqlaşdırmaq səlahiyyətinə malikdir. Bu tədbirlər məhkəmədən asılı olmayaraq tətbiq edilə bilər.
Klub artıq son oyunların videomateriallarını, o cümlədən "Betis"lə keçirilən matçın görüntülərini yoxlayır.
Azarkeş 15 aydan çox müddətdə hər oyunda tünd dəri rəngli, Cənubi Amerikalı və bask futbolçulara qarşı ağır təhqirlər səsləndirib. Səs yazılarında ifadələrin kobudluğu açıq görünür.
İspaniya futbolunda son bir ildə verilən qərarlar nifrət cinayətlərinə qarşı sərt xətti təsdiqləyir:
• 2024-cü ilin iyununda Valensiya məhkəməsi "Real Madrid"li Vinisius Juniora qarşı rasist təhqirlərə görə 3 azarkeşi 8 ay həbs və 2 il stadionlara giriş qadağası ilə cəzalandırdı.
• Barselona Ali Məhkəməsi "Espanyol" azarkeşini İnyaki Uilyamsa qarşı primat jestlərinə görə 1 il həbs, 1080 avro cərimə, 4 il idman sahəsində işləmə qadağası və 2 il stadionlardan uzaqlaşdırma cəzası ilə mühakimə etdi.
