Valdas Dambrauskas: "Şamaxı" üzərində qələbə və futbolçuların mübahisəsi haqqında

"Sabah" Azərbaycan Premyer Liqasının 2-ci turu çərçivəsində səfərdə "Şamaxı"ya qalib gəlib.

İdman.biz xəbər verir ki, qarşılaşmadan sonra paytaxt təmsilçisinin baş məçqçisi Valdas Dambrauskas mətbuat konfransında jurnalistlərin suallarını cavablandırıb.

Litvalı mütəxəssis 2:1 hesabı ilə qalib gəldikləri matçı belə şərh edib: "Çox-çox çətin oyun oldu. Bildiyim qədər, artıq dörd il idi, biz burada qalib gələ bilmirdik. Mənim üçün bu qələbə çox xoş oldu. Rəqib çox çətin idi. Onu demək istəyirəm ki, bura gələn komandalar yüz faiz can qoymasalar, istədikləri nəticəni əldə edə bilməyəcəklər. Çox yaxşı müdafiə olunurlar. İlk dəqiqədə fərqləndik. Biz bunu həftə ərzində məşq etmişdik. Nəticəsini də gördük.

Rəbiq ikinci hissədə möhtəşəm qolla fərqləndi. Amma şadam ki, biz bunun əvəzini çıxıb ikinci qolumuzu vurduq və qələbə qazandıq.

Avropa oyunlarından sonra daxili çempionatlara köklənmək heç vaxt asan olmur. Fikirləşirsən ki, futbolçuların motivasiyası necə olacaq, daxili oyunlara necə reaksiya verəcəklər. Bunun üçün ilk növbədə nizam-intizamı yoluna qoymaq lazımdır.

Oyunun gedişində futbolçularımın mübahisə etməsinin səbəbi daha yaxşı çıxış etmələri ilə bağlı idi. Əlbəttə, belə halları görməkdən məmnun deyiləm. Amma artıq oyundan sonra onlar qucaqlaşdılar və düşünürəm ki, hər şey qaydasındadır.

Daha çox oyunçularımın məşqə necə yanaşmalarına baxıram. Onların milliyyətinə, pasportlarına baxmıram. Rəqiblərə uyğun heyəti formalaşdırıram, məşqdə çıxışlarına uyğun əsas heyət müəyyənləşdirirəm".

idman.biz