Sport24.az
Misli Premyer Liqasının XI turunun "Kəpəz" – "Sabah" oyunundan (1:3) sonra qonaq komandanın baş məşqçisi Valdas Dambrauskas jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…
– Qələbə münasibətilə "Sabah" ailəsini təbrik edirəm. Nəticə yaxşıdır, qollar vurduq, qalib gəldik. Lakin bəzi məqamlardan razı qalmadım. Oyunun əvvəlində səhvlər etdik. "Kəpəz" oyuna yaxşı hazırlaşmışdı. Topu qəbul edir, uzun ötürmələrlə oynamağa çalışırdılar. Hücumçuları da bu ötürmələrə açılırdılar. Bu da bizim müdafiəçilərimizdən diqqət istəyir. Bir balaca yuxulamış olsaydıq, rəqib bizi cəzalandıracaqdı. Oyundan məmnun deyiləm. Möhtəşəm meydança var idi, amma kifayət qədər səhvlər etdik. Düşünürəm ki, daha yaxşı oynamalı idik. Amma hər bir halda, üç xal qazanmısansa, çox yaxşıdır. Qarşıda milli komandanın oyunlarına görə yaranan fasilədə uşaqlara istirahət verib, daha sonra bərpa olacağıq.
– "Qarabağ"la təxirə salınmış oyunda qələbə qazansanız, lider ola bilərsiniz. Nədən narazısınız ki?
– Düşünürəm ki, böyük komandalara qarşı dominant futbol oynaya bilirik. Amma bu gün bunu bacarmadıq. Rəqib müdafiəmizi yarmağa çalışırdı. Mövqe səhvlərinə yol verdik. Kifayət qədər ritmdə deyildik. Dominant "Sabah"ı hiss etmədim. Hətta yarımmüdafiədə düzgün oynamadıq. Dəyişikliklər etdik, bir balaca oyunu artırdı. Amma rəqibin ilk təzyiqini yardıqdan sonra irəlidə yaxşı epizodlar yaratsaq da, sonluq gəlmirdi. "Qarabağ", "Neftçi", "Araz-Naxçıvan", "Turan Tovuz" kimi komandalarla oyunlarda bir-iki şansın olur və bundan yararlanmalısan. Düzdür, turnir cədvəlində irəliləmişik. Amma bugünkü "Sabah" istədiyim komanda deyil. Performansımız istədiyim kimi deyildi.
– Parris ikinci hissədə oyuna daxil olsa da, sonra əvəzləndi. Bu, nə ilə bağlı idi?
– Oyunundan narazı qaldım. Meydançaya daxil olduqdan sonra istədiklərimizi həyata keçirmədi. Tapşırıqları yerinə yetirmədiyi üçün əvəzlədim. Düzgün qərarlar vermirdi. Onun əvəzinə meydana daxil olan Xəyal Əliyev 7-8 dəqiqə oynamasına baxmayaraq, təsirli ola bildi. Bir oyunçu istədiklərimi verə bilmirsə, həll yolu tapmalıyam.
– Bu oyun bir kənara. "Sabah" istədiyiniz səviyyədədirmi?
– Həmişə demişəm, mənimçün önəmli bir oyun bitdikdən sonrakı məşq və növbəti matçdır. Turnir cədvəlinə baxmırıq. 10-12 oyun əvvəl nələrinsə olduğunu demək düzgün deyil. Bu günə baxırıq. Fərdi və individual səhvlərimiz üzərində çalışmalıyıq. Mənimçün önəmli olan şeylərdən biri də davamlılıqdır. Eyni zamanda köklənmək də vacibdir. Komandamda döyüşkən ruh olmasını istəyirəm. Düzdür, bu gün xoşbəxtlikdən hesab 3:1 idi. 85-ci dəqiqədə rəqib fərqi azaltsaydı, gərginlik yarana bilər, fərqli nəticələr ola bilərdi. İstədiyim odur ki, 3:1-dən sonra da qollar vurmağa çalışım.
– Komandanız çempionluğa namizəd göstərilir. Axşamkı "Qarabağ" – "Neftçi" oyununda hansı nəticəyə ümid edirsiniz?
– Nəticənin bizim üçün fərqi yoxdur. Bir-iki aydan sonra nələrin olacağını demək çətindir. Təkanı yaxalamaq önəmlidir. İstərdim ki, belə oyunlar gərgin mübarizə şəraitində keçsin. Güclü komandaların olması çempionatın inkişafı üçün yaxşı olacaq.
