Idman.biz
"Gələcəkdə də Azərbaycanda yeni yerləri kəşf etməyi böyük məmnuniyyətlə davam etdirmək niyyətindəyəm".
Bunu "Sabah"ın litvalı baş məşqçisi Valdas Dambrauskas AZƏRTAC-a müsahibəsində deyib.
Həmin müsahibəni təqdim edirik:
- Şahdağ səfəriniz sizdə hansı xüsusi təəssürat yaratdı? Bu səfərdən sonra Azərbaycan təbiəti haqqında sizdə necə fikirlər formalaşdı?
- Fərqli ölkələri və mədəniyyətləri görmək, təbiəti kəşf etmək, yerli insanlarla tanış olmaq imkanı mənim üçün böyük təcrübədir. Futbol sahəsində işləməyin ən gözəl tərəflərindən biri də budur. Bu iş insana həftəsonu qazanılan qələbədən daha çoxunu verir. Bu dəfə millinin oyunları ilə bağlı fasilədə Şahdağa getdim. Laza və Xınalıq kəndlərində səyahətdə oldum. Landşaftı çox düz olan Litvadan gəldiyim üçün dağlara və yüksəkliklərə xüsusi marağım var. Şahdağda onların kifayət qədər çox olduğunu gördüm. Bu, unudulmaz səyahət idi.
Təmiz dağ havasını hiss etmək, gözəl yerləri və qarlı zirvələri görmək, yerli insanlarla tanış olmaq, onların hekayələrini dinləmək, Azərbaycanın tarixi haqqında öyrənmək möhtəşəm təcrübə oldu, günlərimi çox dəyərli etdi. Bundan öncə Siyəzəndəkı dağlara və Qobustan Milli Parkına da getmişdim. Bu səfərlər də məndə çox gözəl təəssüratlar yaratdı. Azərbaycan çox gözəldir və burada görəcək, öyrənəcək o qədər şey var ki….
- Azərbaycanın digər bölgələrini də ziyarət etməyi planlaşdırırsınız?
- Gələcəkdə də Azərbaycanda yeni yerləri kəşf etməyi böyük məmnuniyyətlə davam etdirmək niyyətindəyəm. Dediyim kimi görəcək və öyrənəcək çox şey var. Səyahət etməyi və yeni yerlər kəşf etməyi sevirəm. "Sabah" klubunun əməkdaşları mənim səyahət etməyi sevdiyimi öyrənəndə bu istiqamətdə çoxlu tövsiyələr verdilər. Bunu mütləq davam etdirəcəyəm. Yeganə problem vaxtdır. Mövsüm ərzində çox məşğul oluruq, amma nə zaman bir az boş vaxt tapsam, mütləq harasa gedib yeni yerlər görməyə çalışıram.
- Bu cür səfərlər sizə məşqçi kimi motivasiya verir, yoxsa daha çox şəxsi istirahət xarakteri daşıyır?
- Hər ikisi. Baş məşqçi işi həm çox çətin, həm də tələbkardır. Təkcə futbol məşqlərini və taktikanı bilmək kifayət etmir. Bundan çox daha artıqdır. İlk növbədə anlamalıyıq ki, biz maşınlarla yox, insanlarla işləyirik. Onları nəyin irəli apardığını, nəyin motivasiya etdiyini başa düşməlisən. Hər gün 30–40 nəfərin qarşısına çıxmalı, onlarla danışmalı, istiqamət verməli, ruhlandırmalı, liderlik etməlisən. Bunu bir gün, iki gün, yeddi gün etmək asan deyil, amma aylarla, bütün mövsüm boyunca davam etdirmək əlbəttə ki, çətindir. Bunun üçün hər gün özünü bir az da inkişaf etdirməlisən ki, boşluq buraxmayasan. Mən müxtəlif mənbələrdən ilham alıram. Məsələn, kitablardan, insanlardan, filmlərdən, teatr və musiqidən və sair. Səyahət də bunlardan biridir. Yerli mədəniyyəti, tarixi və ənənələri anlamaqla yerli futbolçularla daha yaxşı bağ qura bilirəm və onları daha yaxşı başa düşürəm.
- Qış transfer pəncərəsində hansı mövqeləri gücləndirməyi planlaşdırırsınız?
- Transfer pəncərələri zamanı güclənmək baş məşqçi, skautinq komandası, idman direktoru və idarə heyətinin birgə işidir. Bu, heç vaxt bir günlük məsələ deyil. Bir transfer pəncərəsi bitən kimi növbətisinə hazırlaşmağa başlayırsan. Müxtəlif liqaları və futbolçuları izləyirsən, axtarış aparırsan, analiz edirsən.
Mövsümün bu vaxtında hansı mövqeləri gücləndirəcəyimizi dəqiq demək hələ çətindir. Mən heç vaxt transfer xatirinə futbolçu götürməyin tərəfdarı olmamışam. Mənim üçün əsas olan odur ki, yeni oyunçu bizdə çatışmayan yeni ölçü və keyfiyyət gətirsin. Bu səbəbdən hazırkı heyətimizi uğurlu hesab edirəm. İnanıram ki, futbolçularımın komandaya verəcəyi çox şey var və sahib olduğumuz potensialı tam şəkildə hələ göstərməmişik. Gözləyək və görək gələcək bizə nə gətirəcək.
- Hazırda "Sabah" çempionatda 3-cü pillədə qərarlaşıb. Mövsümün sonu hədəfləriniz nədir?
- Əsas məqsədimiz yaxşı futbol oynamaq və mümkün qədər uğurlu nəticələr əldə etməkdir. Yəni, elə matçlar keçirməliyik ki, biz oyuna dominantlıq edək, 90 dəqiqə rəqibə təzyiq göstərək, təhlükə yaradaq və qollar vuraq. Əgər "Sabah"ı bunun üzərində formalaşdıra bilsək, nəticələr öz-özünə gələcək.
Hazırda azarkeşlərimizin və digər komandaların tanıya biləcəyi bir futbol mədəniyyəti və oyun kimliyi qururuq. Bunun üçün ilk addım komandada hər bir rəqibi məğlub edə biləcəyimizə inam yaratmaqdır. Bu inamı formalaşdırdıqdan sonra isə daha böyük hədəflər barədə xəyallar qura bilərik.
- Komandanın oyun üslubunda mövsümün əvvəlindən bu günə kimi hansı dəyişiklikləri ən uğurlu hesab edirsiniz?
-Düşünürəm ki, mövsümə potensialımıza uyğun olmayan şəkildə başladıq. Digər komandalarla müqayisədə avrokuboklarda mübarizəyə daha erkən start verdik. Yerli çempionat başlamazdan əvvəl artıq 6 oyun keçirmişdik. Bir tərəfdən bu üstünlükdür, amma digər tərəfdən avrokubokdan ayrılan komandalarda adətən kiçik performans enişi olur. Bizdə də bu eniş yerli liqanın ilk üç oyununda yaşandı.
Ondan sonra isə inkişaf etdik. Bəzən bu inkişaf daha çox, bəzən isə gözəçarpan dərəcədə az idi. Fikrimcə, hazırda liqada pressinq, əks-pressinq, ön xətdə topu qazanıb epizod yaratmaq üzrə ən yaxşı komandalardan biriyik. Lakin bununla yanaşı, müdafiə xəttimiz də yaxşı mənada fərqlənir. Bütün bunlar gələcək üçün bizə güclü təməl yaradır.
Lakin eyni zamanda daha yaxşı etməli olduğumuz çox şey var. Hücum potensialımızdan tam istifadə etmirik, kifayət qədər qol vurmuruq, kifayət qədər imkan yaratmırıq, hücum fazasında axıcı futbol oynamırıq. Bunların hamısı yalnız çoxlu məşq və fokuslanmış hazırlıqla mümkün olacaq. Buna görə də növbəti məşq bizim üçün ən vacib məşqdir. Diqqəti əldən verməməli və bu sahələri inkişaf etdirmək üçün çox çalışmalıyıq ki, rəsmi oyunlarda daha yaxşı və daha inamlı çıxış edək.
