Sport24.az
Ötən axşam ölkə futbolu iki mühüm "partlayış"la yadda qaldı. Maraqlıdı ki, hər iki hadisə eyni oyundan sonra yaşandı: əvvəlcə 1 tur öncə "qaranlıq"da danışmaq istəyən Samir Abasov səhnəyə çıxdı və "avrokuboka vəsiqə qazanmasanız, istefa verəcəksinizmi?" sualına üsyan etdi, ardınca isə Cavid Hüseynov "təsəvvür edirsiniz, qələbəyə görə cəmi 500 manat mükafat verirlər", - dedi.
Başlayaq Abasovun "dediklırinizin arxasında 100 faiz nələrsə gizlənir", - ifadəsindən. Cənab Abasov, ölkənin ən qocaman, ən imkanlı, ən çox azarkeş kütləsinə sahib klubunun Çempionlar, Avropa Liqası da yox ha, ümumiyyətlə, avrokubok zonasına düşməməsi yumşaq desək, ayıbdı. Bax, indi mən də deyim ki, "Samir Abasovlu "Neftçi" avrokuboklara vəsiqə əldə etməsə, bunun arxasında "nələrsə gizlənir". Bu cür ittihamları səsləndirmək ab-surd-du! Əlbəttə ki, söhbət peşəkarlardan gedir. İndiki halda isə hər iki tərəf peşəkardı - jurnalist də, mütəxəssis də. O zaman, Samir bəy, zəhmət çəkin, peşəkar da davranın!
Keçək Cavid Hüseynovun "500 manat mükafat" məsələsinə. Komandaya ayrılan vəsait qarşılığında (fərq etmir, bu, 1 milyondu, yoxsa 10 milyon) nəticələrə görə cavabdeh şəxs ən pis göstəriciyə sahibdi. Görülən işə görə imzalanan müqavilədə məvacib göstərilir. "Görülən işin aynası" turnir cədvəlindədi. Ancaq buna baxmayaraq, zaman-zaman qələbə qazanılanda 500 manat mükafat da verilir. Hüseynov hər oyunda can qoyan nümunəvi futbolçu olub. Ancaq məşqçi kimi əvvəlcə, "Şamaxı" layihəsində (ancaq yerlilərlə Premyer Liqada qalmaqdan ibarət absurd ideya) iflasa uğradı, ardınca isə "Səbail"i uçurumun bir addımlığına gətirib. Və bu vəziyyətdə "qələbəyə görə cəmi 500 manat mükafat verirlər" demək… Mətbuat konfransında əyləşənlərin əksəriyyəti 500 manatla 1 ay ailə saxlayır, cənab Hüseynov! Onların önündə bu rəqəmi səsləndirmək özlüyündə ayıb addımdı. "Səbail"in durumu əvvəlcədən hər kəsə, o cümlədən sizə də məlum idi. Əlbəttə, Hüseynovun dünən dediklərindən daha böyük səhvi "Səbail" rəhbərliyi buraxdı. Premyer Liqada yalnız acı təcrübəsi olan gənc mütəxəssisə "batan gəmi"ni xilas etmək missiyasını həvalə etməyin bədəli məhz belə olmalı idi.
CEYHUN ƏLİYEV
P.S. Son zamanlar idman mediasına qarşı qəribə tendensiya formalaşıb: baş məşqçilər verilən sualların keyfiyyət(sizliy)indən gileylənirlər. Cənab məşqçilər, futbol camiəsində ən aşağı maddiyyata sahib olan jurnalistlərdi, ancaq unutmayın ki, ən baha nüfuza sahib də məhz bu zümrəyə daxil olanlardı. Verilən sual ürəyinizcə olmaya bilər, ancaq təqdim etdiyiniz futbolun qarşılığında bundan onqat sərt suallar da halalınızdı.
