Sport24.az
"Matçın ağır keçəcəyi öncədən bəlli idi. Kimə qarşı oynadığımızı da bilirdik". Bu sözləri Sport24.az-a "Araz-Naxçıvan"ın futbolçusu Urfan Abbasov deyib.
Cinah müdafiəçisi "Qarabağ"ı 1:0 hesabı ilə məğlub etdikləri Azərbaycan Kubokunun yarımfinal mərhələsinin ilk oyunu ilə bağlı fikirlərini bölüşüb:
"Qarabağ" güclü rəqibdir. Amma biz də qarşılaşmaya əliboş çıxmamışdıq. Meydanda var gücümüzü qoymağa çalışırıq. Şükürlər olsun ki, yaxşı müdafiə olunduq, qalibiyət əldə etdik. Hətta bəzi epizodlar oldu ki, onlardan istifadə etsəydik, daha yaxşı olardı".
Oun sözlərinə görə "Qarabağ" kimi rəqibə qarşı daha diqqətli oynamalısan: "Rəqib elə gücə sahibdir ki, buraxdığın ani səhvdən istifadə edə bilər. Diqqətli olmağa çalışdıq, məncə, bizdə pis alınmadı".
Abbasov cavab qarşılaşmasının daha ağır keçəcəyini söyləyib: "Daha çox güc sərf edəcəyik. Amma hələlik vaxt var. Öz oyunumuzu da analiz edəcəyik".
Futbolçu Premyer Liqada 2025-ci ildə cəmi bir qələbə əldə etmələrinə də toxunub: "Üçüncü dövrəyə pis başladıq. Qalibiyyət əldə edə biləcəyimiz görüşlərdə xallar itirdik. Amma qarşıda oyunlarımız var. Xallar və yaxşı nəticələr qazanmaq istəyirik".
