Idman.biz
"Araz Naxçıvan"da qaldığım üçün sevincliyəm".
Bunu İdman.biz-ə "Araz Naxçıvan"ın futbolçusu Ürfan Abbasov deyib.
O, Naxçıvan təmsilçisinin onunla 2025-2026-cı illər mövsümünün sonuna qədər müqaviləni uzatmasına münasibət bildirib. 34 yaşlı futbolçu bildirib ki, klubda qalmasında baş məşqçi Elmar Baxşıyevin mühüm rolu olub: "Zəng vurub mənimlə işləmək istədiyini dedi. Mən də məmnuniyyətlə qəbul etdim. Uzun müddətdir ki, Elmar müəllimlə eyni komandadayıq, bir-birimizi yaxşı tanıyırıq. Onunla işləmək mənə xoşdur".
Abbasov hələlik klubunu dəyişmək istəmədiyini deyib: "Düzünü desəm, hələ təklif olmamışdı. Ancaq olsaydı belə Elmar Baxşıyevin olduğu yerdə qalmağı düşünərdim. Əgər klub məni istəməsəydi, başqa variantları fikirləşəcəkdim".
Qeyd edək ki, son klubu "Qəbələ" olan Ürfan Abbasov "Qarabağ" və "Səbail"in də formasını geyinib.
Aytac Sahəd
İdman.biz
