Sport24.az
UEFA "Real"ın dörd futboçusuna qarşı intizam işi açıb. Sport24.az xəbər verir ki, bunlar Kilian Mbappe, Vinisius Junior, Daniel Sebalyos və Antonio Rudigerdir.
UEFA bu futbolçuların Çempionlar Liqasının 1/8 finalında "Atletiko" ilə oyundakı davranışlarını araşdırır.
Bundan əvvəl mətbuatda "Atletiko"nun UEFA-ya müvafiq şikayət göndərdiyi barədə məlumatlar yayılmışdı. "Atletiko" UEFA-ya "Real"ın oyunçularının qeyri-etik davranışlarını əks etdirən 4 video təqdim edib. Videolarda xüsusilə Rudiger və Vinisiusun "Atletiko" azarkeşlərinə qarşı təxribat xarakterli jestlər etməsi əks olunub.
Xatırladaq ki, "Atletiko" - "Real" matçı meydan sahiblərinin 1:0 hesablı qələbəsi ilə başa çatıb. Lakin ilk görüşdə "Real" 2:1 hesablı qələbə qazandığı üçün əlavə vaxt oynanılıb. Bu zaman komandalar fərqlənə bilməyiblər. Penaltilər seriyasında isə "kral klubu" üstün olaraq mərhələ adlayıb - 4:2.
