Sport24.az
UEFA "Qarabağ" və "Ayaks" arasında keçiriləcək UEFA Çempionlar Liqası matçı öncəsi statistik məlumatları açıqlayıb. Sport24.az-ın məlumatına görə, tərəflər arasında avrokuboklardakı yeganə əvvəlki qarşılaşma ötən mövsüm UEFA Avropa Liqasının əsas mərhələsində baş tutub.
Niderland klubu Azərbaycanda 3-0 hesabı ilə qələbə qazanıb.
"Qarabağ" son beş UEFA turniri matçında Niderland komandalarına qarşı qələbə qazana bilməyib (3 heç-heçə, 2 məğlubiyyət).
Bu mövsüm evdə keçirdiyi son beş avrokubok matçından yalnız birində məğlub olan "köhlən atlar", doğma meydanda oynadığı son dörd oyunda isə hər dəfə ən azı iki qol vurub.
"Ayaks" hazırda UEFA klub yarışlarında səkkiz oyunluq məğlubiyyət seriyası yaşayır ki, bu da klub tarixində ən uzun seriyadır.
Amsterdam komandası Avropa Kuboku/Çempionlar Liqası tarixində (seçmə mərhələlər daxil olmaqla) 397 qol vurub. Komanda 400-cü qolunu vuraraq bu həddi keçən ilk Niderland klubu olmağa çalışacaq.
Qeyd edək ki, dekabrın 10-da baş tutacaq "Qarabağ" - "Ayaks" matçı saat 21:45-də başlayacaq.
