Idman.biz
UEFA "Milan" və "Barselona" klublarına La Liqa və A seriyasının oyunlarını xaricdə keçirməyə icazə verib.
İdman.biz xəbər verir ki, La Liqa daha əvvəl ABŞ-ın Mayami şəhərində "Vilyarreal" – "Barselona" matçının keçirilməsi üçün UEFA-dan icazə istəyib, A Seriyası isə Avstraliyanın Pert şəhərində "Milan" – "Komo" oyununun keçirilməsinin mümkünlüyü ilə maraqlanıb.
Avropa Futbol Assosiasiyaları İttifaqı (UEFA) istisna olaraq İspaniya və İtaliya liqalarının oyunlarının xaricdə keçirilməsinə icazə verib, lakin yerli liqa oyunlarının öz ölkələrində keçirilməli olduğunu bəyan edib.
"UEFA bu gün daxili liqa oyunlarının öz ölkələrindən kənarda keçirilməsinə birmənalı qarşı olduğunu bir daha bəyan etdi.
Keçən ay Tiranada keçirilən İcraiyyə Komitəsinin iclasından sonra UEFA İspaniya və İtaliya milli assosiasiyalarından daxil olan müraciətləri nəzərə alaraq, bu işin təsir dairəsini qiymətləndirmək üçün maraqlı tərəflərlə əlavə məsləhətləşmələr apardı.
Bu məsləhətləşmələr azarkeşlər, digər liqalar, klublar, oyunçular və Avropa qurumları tərəfindən yerli liqa oyunlarının xaricdə keçirilməsi ideyasına dəstək verilmədiyini təsdiqlədi.
Bununla belə, hazırda nəzərdən keçirilən FIFA-nın müvafiq normativ-hüquqi bazasında aydınlıq və təfərrüatların olmadığını nəzərə alsaq, UEFA İcraiyyə Komitəsi istəksizcə bu iki sorğunu müstəsna əsaslarla təsdiqləməyə qərar verdi.
UEFA gələcək qaydaların ölkədaxili yarışların bütövlüyünü və klublar, onların azarkeşləri və yerli icmalar arasında sıx əlaqəni təmin etməsi üçün FİFA-nın cari işində fəal iştirak edəcək", - UEFA-nın bəyanatında deyilir.
