Bu həftə keçiriləcək XXXIII tur Misli Premyer Liqasını tərk edəcək komandanın adına aydınlıq gətirə bilər.

İdman.biz xəbər verir ki, turnir cədvəlinin sonuncu pilləsində qərarlaşan "Səbail" uçurumun astanasındadır.

Elvin Məmmədovun baş məşqçisi olduğu komanda sona 3 tur qalmış futbolumuzun elitasında yerini itirmək təhlükəsi ilə üzləşib. "Səbail" I Liqaya qayıdışını növbəti turlara təxirə də sala bilər. Finişə 4 tur qalmış 21 xala malik paytaxt təmsilçisi "Kəpəz"dən 7, "Sumqayıt"dan 9 xal geri qalır.

Mütləq qələbə
"Dənizçilər" mayın 3-də "Şamaxı"nın qonağı olacaq. Aşağı dəstəyə düşən yeganə komanda olmaq təhlükəsindən ən azı bir turluq uzaqlaşmaq üçün mütləq qələbə əldə edilməlidir. Əgər "Səbail" Şamaxıda 3 xal qazansa, növbəti turadək ümidlərini saxlayacaq. Bakı klubu səfərdə xal itirsə, mayın 4-də keçiriləcək görüşləri gözləyəcək.

Şamaxıda heç-heçə olsa...
Bu turda təkcə "Səbail" deyil, I Liqaya yuvarlanmaq ehtimalı qalan "Sumqayıt"la "Kəpəz" də səfərdə meydana çıxacaq. Sonuncuların ikisi də adlı-sanlı rəqibin qonağı olacaq. Sumqayıtlılar "Qarabağ"la, Gəncə təmsilçisi "Neftçi" ilə səfər görüşündə xal almağa çalışacaq. Əgər "Səbail" heç-heçə etsə, "Sumqayıt" uduzmasa, "Kəpəz" qalib gəlsə, sonuncu yerin sahibi dəqiqləşəcək.

Məğlubiyyət acısı
"Səbail"in Şamaxıda uduzması "Sumqayıt"ın işinə yarayacaq. Vaqif Cavadovun yetirmələri meydana çıxmadan Premyer Liqada yerini qorumuş olacaq. "Kəpəz" eyni sonluq üçün qalib gəlməlidir. Bir sözlə, gəncəlilər və şamaxılılar qələbə qazansalar, "Səbail" I Liqanın yeni mövsümünə planlarını qurmağa başlaya bilər. Çünki bu nəticələr "dənizçilər"i sonuncu edəcək.

Qeyd edək ki, "Səbail" 2017/18 mövsümündən Premyer Liqada mübarizə aparır.

Vüqar Xeyrullayev
İdman.biz