Bu gün avrokuboklarda mübarizəyə başlayacaq "Zirə" Moldovada "Şerif"in qonağı olacaq.
İdman.biz xəbər verir ki, bu, Bakı klubunun qitə miqyaslı turnirlərdə üçüncü cəhdidir.
Avropa Liqasında ikinci dəfə mübarizə aparacaq komandanın debütü 2017/18 mövsümünə təsadüf edib. Həmin vaxt paytaxt təmsilçisi Lüksemburq "Differdanj"ını hər iki görüşdə məğlub edib. Bu qələbələr hələlik qəsəbə klubunun Avropadakı son uğurlarıdır. Sonradan daha 4 matça çıxan "Zirə" qitədəki 7-ci matçında bu rəqəmin xoşbəxt hesab olunmasını nəticə ilə sübut etməlidir.
Həmin vaxt lüksemburqluları keçən bakılılar növbəti raundda "Astra"ya Rumıniyada uduzub. Səfərdəki qol komandanın avrokuboklardakı son topu kimi yadda qalıb. Sonrakı üç görüşdə "Zirə" rəqib qapısına yol tapmayıb.
Bakıda həm "Astra" ilə, həm də iki il əvvəl "Makkabi" ilə qolsuz heç-heçə edən zirəlilər İsraildə də üç top buraxıb. Amma bu dəfə rəqibi məyus edə bilməyib.
Ümumilikdə 4 oyun qələbəsiz və 3 matç qolsuz qalan komandanın 6 görüşdə 2 qələbə və 1 heç-heçəsi var. Üç dəfə uduzan "Zirə" 5 qol vurub, 7-ni buraxıb.
2017/18 mövsümü
Avropa Liqası
I təsnifat mərhələsi
"Zirə" – "Differdanj" – 2:0, 2:1
II təsnifat mərhələsi
"Astra" – "Zirə" – 3:1, 0:0
2022/23 mövsümü
Konfrans Liqası
"Makkabi" Təl-Əviv – "Zirə" – 3:0, 0:0
Qeyd edək ki, "Şerif" – "Zirə" qarşılaşması Bakı vaxtı ilə saat 21:00-da başlayacaq.
İdman.biz