Idman.biz
"19 yaşadək futbolçular arasında Avropa çempionatının 2026/2027 mövsümünün birinci seçmə mərhələsinin B liqasının altıncı qrupunda yer alan Litva və Şimali İrlandiya Azərbaycan millisi üçün uyğun rəqiblərdir".
Bunu U-18 yığmasının baş məşqçisi İlham Yadullayev deyib.
Mütəxəssis növbəti il U-19 Avropa çempionatında mübarizə aparacaq komandasının şanslarını dəyərləndirib.
"Düşünürəm ki, uyğun rəqiblərdir. B Liqasında mübarizə aparacağıq. İlk oyunumuz Litvaya qarşı olacaq. Daha sonra Şimali İrlandiya komandası ilə görüşəcəyik. Oyunlarımız Litvada keçiriləcək. Yaxşı hazırlaşıb uğurlu nəticə əldə etməyə çalışacağıq. U-17 səviyyəsində bu rəqiblərlə qarşılaşmamışıq. Amma U-19 səviyyəsində rəqib olmuşuq. Düzdür, hər iki komanda fiziki cəhətdən bizimkilərlə müqayisədə seçilirlər. Lakin onlara qarşı oynamaq mümkündür", - deyə o, "Report"a açıqlamasında deyib.
Qeyd edək ki, U-19 2026-cı il martın 25-də Litva, bundan 3 gün sonra isə Şimali İrlandiya ilə üz-üzə gələcək. 6-cı qrupun oyunları Litvada keçiriləcək.
