Sport24.az
Artıq ötən həftə AFFA-nın bayrağı altında keçirilən müxtəlif yaş qrupları üzrə liqalarda da yeni mövsümə start verilib. Assosiasiyada rəhbər dəyişikliyindən sonra düşünmək olardı ki, uşaq liqalarına daha çox diqqət ayrılacaq, əvvəlki illərdə üzləşdiyimiz çatışmazlıqlar aradan qalxacaq, peşəkarlaşmaq yönündə daha ciddi işlər görüləcək.
Ancaq çox təəssüf ki, arzular elə istək olaraq da qalmaqdadı. İlk turdan işə qeyri-peşəkar yanaşmanın, oyunların "yola verilməsinin" şahidi oluruq.
Şənbə günü U-17 liqasında "Sumqayıt" öz meydanında "Masallı"nı qonaq edirdi. Hər iki kollektiv reqlamentə uyğun vaxtında dəhlizə çıxıb meydana çıxmağa hazırlaşırdı. Və bu an məlum oldu ki, qarşılaşma vaxtında, daha dəqiq desək, əvvəlcədən planlaşdırldığı kimi 16:00-da başalamayacaq. Səbəb? Çox gülməli və ağlamalıdı...
Oyuna təyinat alan laysmanlardan biri hələ gəlib çıxmayıb. Təsəvvür edirsiz, saat 15:55 göstərir, ancaq köməkçi hakim yoxdu! Komandalar isə səbirsizliklə dəhlizdə dayanıb gözləyir. Çempionatın açılış oyunu... Hər iki komandanın üzvləri böyük həvəs və istəklə yeni "futbol ili"nin ilk matçında meydana çıxıb qələbə qazanmaq arzusu ilə alışıb-yanır. Ancaq kimlərinsə işə etinadsız, laqeyd yanaşması səbəbindən yeniyetmələr meydan əvəzinə dəhlizdə isinmə hərəkətləri ilə kifayətlənirlər... Və bu an möcüzə yaşandı. Hamının yolunu gözlədiyi laysman özünü çatdırdı. Yalnız bundan sonra 12 dəqiqəlik kecikmə oyun başladı.
Yəqin ki, məsələ ilə bağlı aiddiyatı qurum bir tədbir görəcək. Əks halda növbəti turlarda daha böyük biabırçılıqlara şahidlik edəcəyik.
