Türkiyədə danışılmış oyun və mərc istintaqında futbolçular və məşhur teleaparıcılar da daxil olmaqla çox sayda şübhəli saxlanıldı

İstanbul Cumhuriyyət Baş Prokurorluğunun apardığı danışılmış oyun və mərc istintaqı çərçivəsində ümumilikdə 35 şübhəli saxlanılıb.

İdman.Biz xəbər verir ki, MASAK və PFDK-nın təqdim etdiyi məlumatlar əsasında 101 futbolçu maliyyə və mərc fəaliyyətləri baxımından təhlil edilib. Araşdırma nəticəsində "Qalatasaray"ın futbolçusu Metehan Baltacı da daxil olmaqla 27 oyunçunun öz komandalarının iştirak etdiyi matçlara mərc etdiyi aşkarlanıb.

İstintaq materiallarında "Fənərbaxça"nın futbolçusu Mert Hakan Yandaşın isə başqa şəxsin adına açılmış hesab üzərindən qanuni mərc saytlarında mərc oynadığı müəyyənləşib.

"Ankaraspor" –" Nazilli" qarşılaşması ilə bağlı beş nəfər barəsində "oyunun nəticəsinə təsir göstərmə" şübhəsi formalaşıb. "Ümraniyespor" – "Giresunspor" matçı ilə əlaqədar isə danışılmış oyun razılaşmasının mövcud olduğu iddia edilir və bu epizod üzrə altı nəfər müəyyənləşdirilib.

Araşdırma çərçivəsinə "Adana Dəmirspor"un sabiq prezidenti Murat Sancak, keçmiş hakim Ahmet Çakar, hakim Zorbay Küçük və həyat yoldaşı da "şübhəli maliyyə əməliyyatları" əsas gətirilərək saxlanılıb.

Bundan başqa, məşhur televiziya aparıcıları Ela Rumeysa Cebeci, Meltem Acet və Hande Sarıoğlu da jandarma əməkdaşları tərəfindən saxlanılaraq idarəyə aparılıb.

12:15

İstanbul Cumhuriyyət Baş Prokurorluğu tərəfindən futbolda danışılmış oyun və mərc iddiaları ilə bağlı başladılan əməliyyat davam etdirilir.

İdman.Biz xəbər verir ki, 2023-2024 mövsümündə Türkiyə 2-ci Liqasında keçirilmiş bir matçla bağlı danışılmış oyun və mərc iddiaları əsasında aparılan istintaq çərçivəsində bir sıra klub prezidentləri və çoxlu sayda peşəkar futbolçu saxlanılıb.

Əməliyyat zamanı "Fənərbaxça" klubunun futbolçusu Mert Hakan Yandaş, "Qalatasaray"ın oyunçusu Metehan Baltacı və "Adana Dəmirspor"un sabiq prezidenti Murat Sancak da gözaltına alınanlar arasında yer alıb.

Məlumata görə, hüquq-mühafizə orqanları paralel olaraq bir neçə şəhərdə əməliyyat keçirib və şübhəli şəxslər prokurorluğa aparılıb. İstintaqın ilkin mərhələsində əldə olunan məlumatların əməliyyatın daha da genişlənə biləcəyini göstərdiyi bildirilir.

Hazırda saxlanılan şəxslərin ifadələri alınır, istintaq davam edir. Rəsmi qurumlar tərəfindən yaxın saatlarda məsələ ilə bağlı daha geniş açıqlamanın verilməsi gözlənilir.

İdman.Biz