Idman.biz
Türkiyə Super Liqasının 19-cu turunda "Fənərbağça" öz meydanında "Göztəpə"ni məğlub edə bilməyib. Kadıköydə keçirilən qarşılaşma 1:1 hesablı bərabərliklə yekunlaşıb.
İdman.Biz xəbər verir ki, görüşdə hesab 17-ci dəqiqədə açılıb. Musabanın sol cinahdan ötürməsindən sonra Dorqeles Nene topu boş qapıya göndərərək "Fənərbağça"nı irəli çıxarıb. Lakin üstünlük uzun sürməyib. 24-cü dəqiqədə Arda Okan Kurtulanın ötürməsindən sonra Janderson yaxın məsafədən fərqlənərək tarazlığı bərpa edib.
Matç ərzində hər iki komanda təhlükəli epizodlar yaratsa da, zərbələrdən bəziləri dirəyə tuş gəlib, bəziləri isə dəqiqlikdən uzaq olub. Qalan dəqiqələrdə hesab dəyişməyib.
Bu nəticədən sonra "Fənərbağça" 43 xalla turnir cədvəlində ikinci pillədə qərarlaşıb və lider "Qalatasaray"la xal fərqi üçə yüksəlib. "Göztəpə" isə 36 xalla dördüncüdür.
Növbəti turda "Fənərbağça" səfərdə "Kocaelispor"la, "Göztəpə" isə öz meydanında "Fatih Karagümrük"lə üz-üzə gələcək.
"Rizəspor" - "Alanyaspor" oyunu isə gərginliyi ilə yadda qalıb. 1:1 hesabı ilə başa çatan matçda meydan sahibləri erkən qırmızı kartla azlıqda qalıb. Yannis Papanikolau altıncı dəqiqədə meydandan qovulub. 43-cü dəqiqədə qonaq komandanın oyunçusu Maestro da eyni aqibəti yaşayıb.
Oyunda hesabı "Rizəspor" açıb. 80-ci dəqiqədə Valentin Miheyle fərqlənib. Qonaqların bərabərlik qolunu 89-cu dəqiqədə Stiv Munye vurub.
Hazırda "Rizəspor" turnir cədvəlində 19 xalla 12-ci, "Alanyaspor" isə 22 xalla 10-cu pillədə qərarlaşıb.
20:14
Superliqanın 19-cu turunda "Gənclərbirliyi" "Antalyaspor"un qonağı olub.
İdman.Biz xəbər verir ki, qarşılaşmada hesabı 13-cü dəqiqədə qonaqlar açıb. Sekou Koita fərqlənib. 26-cı dəqiqədə ev sahibləri Dario Şariçin qolu ilə hesabı bərabərləşdirib. "Anatalyaspor"un qələbə qolunu 63-cü dəqiqədə Sander van de Strik vurub.
Qələbə ilə "Antalyaspor" xallarını 19-a çatdırıb.
19:00
Türkiyənin Superliqasının 19-cu turunda "Qaziantep" "Konyaspor"u qəbul edib.
İdman.Biz xəbər verir ki, qarşılaşma 1:1 hesablı heç-heçə ilə yekunlaşıb.
Ev sahibləri hesabı 45+3-cü dəqiqədə Deyan Soreskunun qolu ilə açıb. "Konyaspor"u məğlubiyyətdən xilas edən qol isə 88-ci dəqiqədə Blaz Kramer tərəfindən vurulub.
Bu nəticədən sonra qələbəsizlik seriyası altı oyuna çatan "Qaziantep"nin xalı 25-ə yüksəlib. Qələbə həsrəti doqquz oyuna çatan "Konyaspor" isə 19 xalla kifayətlənib.
Növbəti turda "Qaziantep" səfərdə "Gənclərbirliyi" ilə, "Konyaspor" isə "Beşiktaş"la üz-üzə gələcək.
